Mescos cu un hende cu ta cumpra cos horta, y e ta den su sano huicio, sabiendo bon ,kico e ta haci, pasobra e ta complice di ladronicia, asina un hende tambe cu sa cu locual e ta participa, apoya, of sostene ta pica, toch e ta sigi den dje, ta bira complice of compinche di pica.
Pica ta bini masha bunita awendia, y inmoralidad ta manera prenda, y nos tin cu habri wowo bon y wak cual banda nos ta scohe , pasobra facil mente bo por apoya maldad.
Ora un hende tin poder, no ta nifica cu tur ora e tin rason, pasobra nos ta mira cu tin hopi hende cu tin poder riba mundo , pero nan curason y nan hechonan ta leu for di boluntad di Dios,nan orguyo y nan arogancia a pasa tur limite, mescos di tempo di rey Belsasar.( Daniel 5:25-30).
Ora nos ta wak bon , como yiu di Dios, nos tin di tene bon cuenta, ken nos ta sostene, y ken nos ta apoya, y no tene miedo di nan poder, pasobra bo por haya bo facilmente den idolatria, y ta sostene maldad y hasta impiedad.
No sea pura pa bisa si, pa mantene amistad y bon relacion, pero habri wowo wak bon si boluntad di Dios ta tumando lugar of ta boluntad di hende pa asina por logra locual cu nan kier, pasobra tin hende cu maldad so ta domina nan pensamento. ( Genesis 6:5).
Tur locual ta bay contra palabra y principionan di Dios, aunke hopi ta mire actualmente den mundo como normal, aunke ley ta defende y duna razon y derechi di existencia, nos tin cu keda corda, cu e por complace hende pero dilanti di Dios e ta keda pica.
Mescos cu tolera yui pa usa droga, bebe y cana cu arma y pa biba den inmoralidad , ta haci nos complice di maldad, pasobra nos sa, y nos ta haci manera ta cos normal y hasta bisa cu otronan tambe ta hacie, pero hopi ta lubida kico a costa bida di Eli den 1 Samuel 2;22-25 y 4:14-18.
Aunke con duro cu e por zona , nos mester hala nan atencion fuertemente, y bisa cu locual cu nan ta haci no ta bon, no ta importa cu nan rabia , pero maldad mester wordo exponi, reprende y trece na claridad, pa asina arepentimiento por tuma lugar y asina e alma por wordo salba.
E cos a bira dimas cu inmoralidad y inhusticia ta wordo tolera, malcriansa, falta di respet, falta di educacion ta wordo tolera y nada no ta wordo haci. Ta parce manera hopi mayor a perde nan autoridad, y ta laga cos bay for di man , mientras cu sociedad ta sufri den gara di delicuencia.
Mateo 11:28 ta bisa: Bin serca Mi tur cu ta cansa y carga y lo Mi duna boso sosiego.
Awor no tin motibo pa hende sigi cana den maldad, inmoralidad y perversidad, pasobra serca Dios no tin favorito, tur hende ta bon bini serca Dios, ningun hende no a wordo exclui, tur hende ta inclui, pasobra Dios a stima e mundo.
Pero pica y enganjo di diabel ta pone hende pensa cu nan ta exclui y discrimina, y cu nan no ta safe,pasobra pratica di pica ta trece miedo y berguensa ( Genesis 2:9).
Una bes e bida di pica wordo bandona y e lus di Dios cuminsa briya den bida di hende, no tin motibo di tin nada scondi.
Awor mas cu nunca aparta for di pica, y bini na e lus di Dios.
Sinceramente, Pastor Marcel Balootje
