Un yamada urgente na nos Hubentud.
Ora bo ta un hoben bo tin cu wak bon cu ken bo ta cana, ken ta bo amistad, ki tipo di hende bo tin rond di bo, pasobra mal compania ta danja bon custumber ( 1 Corintionan 15:33).
Aunke con bon bo mayyornan a lanta bo den cas, mal amistad, amistad cu hende bobo, por hinca bo den hopi problema, mientras cu bo cana cu hende sabi, especialmente hende cu stima Dios, bo caminda lo ta limpi y bendiciona.
Pero tene cuenta cu mal amigo, no ta hinca droga, den bo boca y ni tampoco ta basha alcohol den bo garganta, tur e cosnan ey ta bo mes ta habri porta pa nan door di ta frecuentemente hunto cu hende cu ta haci esey, te ora e deseo domina bo mente y gara bo curason.
Palabra di Dios ta bisa:
Sosega den Senjor, y warda cu pasenshi riba dj’E. No cunsumi pa motibo di esun cu ta prospera den su caminda, pa motibo di hende cu ta ehecuta, plan di maldad.( Salmo 37:7).
Pasobra hacidonan di maldad, lo wordo corta kita afo, ma esnan cu spera riba Senjor lo hereda e tera.( Salmo 37:9).
Bendiciona ta e hende cu no ta cana den e conseho di e malbadonan,ni ta para den caminda di pecadornan, ni ta sinta riba stul di bofonadornan.( Salmo 1:1).
Laba boso mes, haci boso mes limpi,kita e maldad di boso hechonan, for di Mi bista,Stop di haci malo.
( Isaias 1:16).
No stima mundo , ni e cosnan cu tin den mundo,Si un hende stima mundo,e amor di e Tata no ta den dje. Pasobra tur loke tin den mundo, e deseo di carni, y e deseo di wowo, y e orguyo di bida, no ta bini di e Tata sino di e mundo.y e mundo ta pasa bay y su deseonan tambe, ma esun cu haci e boluntad di Dios ta permanece pa semper.( 1 Juan 2:15-17).
Y hopi lo sigi nan sensualidad, y pa nan motibo e caminda di berdad lo wordo blasfema, y den nan golosidad pa placa nan lo explota boso cu palabranan di enganjo,nan huicio ta reserva pa nan for di hopi tempo caba, y nan destruccion no ta na sonjo.( 2 Pedro 2:2-4).
Hoben tene bon cuenta cu bo tin cu honra bo tata y bo mama, pa tur cos bay bo bon y pa bo tin bida largo riba e mundo aki.
Rebeldia ta bini di scuridad , for di cueba di diabel, caminda no tin ningun clase di respet ni pa bo mes ni pa ningun hende.
Ora un hende ofrece bo pa bende droga, pa cana cu arma, e persona ey no ta respeta bo, ni tampoco ta balora bo bida, e persona ey no tin ningun clase di amor, ma simplemente kier entrega bo den un bida di bagamunderia, caminda e sa masha bon cu bo ta bay termina den prison of bo ta muri un morto cruel prome cu bo tempo, pasobra e enemigo ta horta bo bida.
No cana drumi cu ningun hende, djis pa experiencia sexual esaki ta conta tanto pa mucha homber como pa mucha muher, pasobra den relacion sexual spiritonan impuro por wordo transferi y bo ta hanja bo den cosnan cu nunca di bo bida, bo a desea di ta.
Ningun hende por sirbi dos shon, pasobra tene bon cuenta cu riba e mundo aki , si bo no ta sirbi Dios, bo ta sirbi e diablo. Asina ta hala serca Dios y biba drechi y decente.
Sinceramente, Pastor Marcel Balootje
