Awel un hende lo puntra ki diferencia tin entre esclavo y catibo, pasobra e palabra ta parce mesun cos.
E ta zona mesun cos pero e no ta funciona mes un cos.
Ora un hende ta esclavo di hende e ta biba segun opinion di hende, tur locual hende bisa e ta haci, tur locual hende papia tin dominio riba dje, manera hende grandi sa bisa, e ta balia manera hende toca. E no tin propio opinion.
E ta depende riba cosnan di mundo, e ta sigi su mes deseo enbes di boluntad di Dios, e ta imita locual e mira otro hende haci.
E ta bida cu e ta biba ta yena cu orguyo y arogancia, pasobra semper e kier midi cu otro hende, semper e kier ta mihor , e no tin tempo pa Dios, e amistad cu mundo tin su cabes completamente domina.
Si nos lesa 2 Timoteo 3 :1-5 ta duna nos un demostracion di un hende cu ta esclavo di hende, caminda placa ta domina su mente, rebeldia a gara su curason, amor pa e ser humano a bandona su curason, e ta ireconciliabel, e no tin control di locual cu e ta papia, e ta duda y pensa cien biaha malo di hende, prome cu e pensa bon di hende.
Humildad a bandona su bida , pa asina orguyo por domina, pasobra tur locual e ta haci ta demostra sensualidad, y nada di seriedad, e ta biba y actua segun conseho di hende y su relacion cu Dios ta kibra.
Esey ta nifica ora hende bira esclavo di hende, y ta lubida e caminda di Dios, pretende di ta sabi, y pensando cu e ta rico, ma pobresa mental y spiritual ta domina su curason.
Pero di otro banda segun scuridad di mundo ta avansa,hende ta wordo atrae pa nan bira catibo di diabel, hibando un bida yen di perversidad, inmoralidad, caminda malo ta wordo yama bon y bon ta wordo yama malo, caminda mentira ta wordo acepta, biba y legalisa, y cual ta haci hende esclavo di scuridad.
Awor bo ta bisa cu tur e lus cu tin den mundo actual, con por ta tin hende cu ta catibo di scuridad, catibo di diabel?
Awel ora un hende ta cambia e berdad di Dios pa mentira , ta nenga di reconoce Cristo Hesus como su Senjor y Salbador e ta cay den e gara di scuridad profundo caminda e tata di mentira ta dirigi su bida y ta hacie su catibo,
Esun cu ta practica pika ta di diabel,pasobra diabel a haci pica for di principio. E Yiu di hende a parese pa e proposito aki, pa e destrui e obranan di diabel.( 1 Juan 3:8).
Si bo ta pensa cu adiccion ta droga y alcohol ta algo tristo, awel tin cosnan mas tristo ainda ora hende ta laga diabel domina nan bida, aunke nan sa cu tin Dios.
Nos sa cu nos ta di Dios, y henter e mundo ta bao di control di e malbado, Nos sa cu Cristo Hesus a sembra e bon simia den e cunuco cual ta e mundo, y nos sa tambe cu e diabel a sembra yerba shimaron den e cunuco, y cu e yerba shimaron ta biba como catibo di e diabel . Asina aki tur hende mester compronde locual Hesus ta bisa kico lo sosode na final ( Mateo 13: 37-43).
Awor no a keda nada mas cu entrega nos bida completamente, na Cristo y biba pa Senjor wardando e binida di Cristo Hesus, pasobra esey ta e unico solucion berdadero.
Sinceramente, Pastor Marcel Balootje
