Bijbel ta spierta nos di hende cu ta cana rond bisando Senjor a bisa, y Senjor a bisa, y caba Senjor no a bisa nan nada, ta nan mes kier halsa nan mes of hunga interesante, y tin biaha hasta confundi hende cu no tin masha conocemento di e palabra di Dios.
Tur hende mester sinja esaki, cada biaha cu un hende bisa Senjor a bisa, e persona cu ta papia, mester duna referencia biblico, pasobra tur locual Senjor papia E ta referencia den su Santo Palabra.
Tin cosnan cu hende ta papia como tradicion cu ningun caminda ta aparece den Bijbel ,cosnan cu hende mes a traha, palabranan y dichonan ,sin ningun rais biblico.
Hende ta bisa cu nan ta sabi, pero nan sabiduria ta puro terenal, yena cu triki, corupcion, mentira, idolatria y hasta inmoralidad.Un sabiduria cu semper ta duna nan bentaha riba nan prohimo, un sabiduria cu ta funciona na nan propio interes solamente.
Den e buki di Santiago of Jacobo den capitulo 1 Palabra di Dios ta bisa cla , cu si un hende tin mester di sabiduria lage pidi Dios, kende ta duna na tur hende generosamente y sin reproche, esey ta nifica cu serca Dios tin sabiduria pa nos tur, no tin mester di envidia otro.
Dios a haci esaki pasobra e sa cu satanas tambe ta ofrece su sabiduria diabolico na hende, y hopi ta bay tras di enganjo di scuridad cu na final ta hiba na perdicion y morto eterno.
Ta algo hopi serio y necesario den nos bida, locual ta e sabiduria di Dios, pasobra ora nos aplica e sabiduria di Dios ningun hende no ta sali perhudica.
Sabiduria di Dios semper ta wordo demostra cu bon conducta.
Pasobra na prome lugar e sabiduria di Dios ta: puro,despues pasifico. Suave,rasonabel,yen di misericordia,y bon fruta,imparcial,sin hipocrecia , y e simia cual su fruta ta husticia,ta wordo sembra den pas door di esnan cu ta haci pas.( Santiago 3;17-18).
Esey ta nifica cu nos no por ta haci malo cu hende, cu un curason yena cu vengansa, y falta di pordon y kere cu nos ta practicando sabiduria di Dios.
E sabiduria di mundo ta yena cu arogancia,egoismo,envidia amargo, y asina ta ganja contra e berdad.E sabiduria aki no ta baha bini for di ariba,ma e ta terenal,natural, diabolico. Pasobra caminda ta existi, envidia y egoismo, tin desorden y tur sorto di cos malo.( Santiago 3;13-16).
For di Bijbel nos por conclui cu ta existi 7 pilar di disiplina y sabiduria.
Confiansa den Dios: ( Proverbionan 3:5) Confia den Senjor cu henter bo curason y no depende riba bo mes comprendemento.
Integridad : ( Proverbionan 10:9) Esun cu cana den rectitud lo cana confiadamente, ma esun cu perverti su camindanan lo wordo descubri.
Puresa : ( Proverbionan 2:20) Asina lo bo cana den ecaminda di e bon hende, y permanece riba e berehanan di e hustunan.
Generosidad : ( Proverbionan 11:25) E hende generoso lo prospera,y esun cu duna di bebe tambe lo hanja di bebe.
Diligencia ; ( Proverbionan 6:6-8). Bay wak vruminga abo floho, observa su maneranan y sea sabi, e no tin hefe, ni capitan , ni gobernante,tog e ta prepara su cuminda den zomer, y ta recohe su provision den tempo di cosecha.
Palabra di sabiduria: ( Proverbionan 12:18) Tin hende ta papia sin pensa manera hinca di spada,ma lenga di hende sabi ta trece curamento.
Bon conseho : ( Proverbionan 27:9) Unguento y perfume ta haci curason contento, mescos cu dulsura di conseho,cu ta sali for di curason di un amigo, ta haci.
Sinceramente Pastor Marcel Balootje
