Tin bruhonan cu ta promove nan servicionan den medionan di comunicacion. E bruhonan ta ofrece bo tur sorto di judansanan, di drecha tur bo problemanan, sanacionnan, suerte etc. y hopi di nan ta bini cu diferente titulonan y nombernan bao di un capa pa ganja hopi hendenan. No bai na e bruhonan, pasobra unabes cu bo bai, bo ta entrega bo mes na e bruhonan y cu nan demonionan. Esaki ta un pika mortal y condenabel den bista di Dios. Pakiko tin algun hendenan conciente di Dios Su boluntad y tog nan ta bai na e bruhonan? Bosonan no ta comprende, cu boso no por ta cu Dios y alaves cu satanas tambe. Den Bijbel Deuteronomio 18: 10-12; Dios Tata ta bisa: “Cu lo no haya meimei di bo, cu ta laga pasa su yiu homber of su yiu muher pasa pa sacrificio di candela; cu lo no tin lesadornan di futuro, ningun hende cu ta consulta cu e astronan (horoscoponan), ni cu e bruhonan, cu no haya ningun hende cu ta consulta cu e spiritistanan, cu mediumnan, cu no haya ningun hende cu ta adivina (tarot) of na esnan cu ta jama e mortonan (montamento). Pasobra Dios Yave ta aborece na esnan cu ta haci e cosnan aki y precisamente E ta expulsanan for di Su bista.” Den Bijbel Leviticonan 20: 6, Dios Tata ta bisa: “Si algun di boso cu ta consulta na e spiritistanan y na e adivinonan pa uni cu nan diosnan falso, lo Mi bira Mi cara contra nan y lo Mi eliminanan den nan pueblo.” Esnan cu ta bai na e bruhonan, e diabelnan ta keda nan tras, nan lo sinti hopi movecionnan stranjo rond di nan, nan lo tende stemnan y hopi bes nan ta wordo posei pa e diabelnan, nan no por drumi anochi y nan no por controla nan mes etc.. Y door di esey e bruhonan ta sigi manda diabelnan pa nan. Hopi di e hendenan aki, cu ta wordo posei pa e diabelnan, nan ta bai para te na e clinica di PAAZ, pa tratamento di psychotic, schizofrenie, dimencia etc..
Hendenan sin fe, ta laganan cai den e sorto di servicionan diabolico aki, na unda cu e bruhonan ta monta pa baha e spiritonan diabolico y nan ta usa bo portret y bo fecha di nacemento den nan ritualnan etc.. Bo fe den Dios ta bisa’bo, pa no bai na e sorto di camindanan robes aki, pero bai na un pastoor of bai na un persona Cristian y hopi spiritual pa e por juda bo y pa e duna bo un bon conseho y spiertamento di e sorto di e hendenan aki. Ora bo tende y lesa di e sorto di servicionan di e bruhonan aki, no core jama y no core bai di biaha, pero pensa prome y bai busca bo informacionnan na un persona spiritual di Iglesia, pa bo no cai den e trampanan di e diabel y pa bo no ofende Dios cu bo pikanan condenabel.
Na esnan cu ta pensa di bai of cu a bai caba na e bruhonan, den Bijbel 1 Cor. 10: 21-22,Cristo-Hesus ta adverti: “Bosonan no por bebe for di e copa di Senjor y den mesun tempo ta bebe for di e copa di e demonionan. Bosonan no por participa na e Cena di Senjor y tambe di e demonionan. Acaso boso kier provoca e rabia di Senjor? Of acaso boso ta mas fuerte cun’E?” Akinan Cristo-Hesus ta adverti, bo no por ta pretende di ta un Cristian y alaves bo ta bai na e bruhonan. Bo no por ta stima Cristo-Hesus y alaves bo ta bai na e bruhonan. Den Bijbel Levitico 19:26, Dios Tata ta bisa bon kla: “No mete boso mes den bruherianan.”
Dios ta bisa bon cla den Bijbel, 2 Tessalonicensenan 1: 8 y 9; “Den candela ardiente pa castiga esnan cu no ta reconoce Dios y na esnan cu no ta obedece na Evangelio di nos Senjor Hesus. Nan lo paga pa esey cu perdicion eterno lew for di Cara di Senjor y di Su Mahestad di Su Forsa.”
Seferino Tromp
