Awendia, bo por lesa den prensa y scucha na radio e servicionan cu e bruhonan ta ofrece. Nan ta discipelnan di satanas. Nan ta bini cu diferente titulonan y nombernan bao di un capa, manera lobonan bisti den cueronan di carne. E bruhonan ta pidi bo nomber, bo portret y bo fecha di nasimento, pa nan monta y yama e diabelnan, pa nan haya informacionnan riba bo y nan ta usa e carta tarrot pa sa bo futuro etc. Unabes cu bo bay na e bruhonan, bo ta keda marka, pasobra e demonionan ta keda bo tras na unda cu bo bay. Si bo puntra bo mes, pakiko? Pasobra ta bo mes a yama e demonionan, pa medio di e bruhonan. Lo bo sinti movecionnan diabolico rond di bo, lo bo tende stemnan rond di bo, pasobra e meta di e demonionan ta, pa nan drenta den bo y pa bo keda posei. Tin hende cu ta posei y sin cu e mes no sa. Pasobra tin ora e persona ta den su mes y tin ora e diabelnan ta domina e persona. E meta di posei ta, cu e diabelnan tin e persona bao di dominio, den un chamber sin salida. Ora cu e persona aki muri, e diabelnan ta bay cu su alma. Compronde bon, e bruhonan ta gana nan plaka pa medio di e servicionan di e demonionan y e bruhonan tin cu paga e demonionan cu bo alma. Na tur esnan cu ta consulta cu e bruhonan of den tarrot, nan destino final ta den e tanki di candela y azufre den fierno, lesa den Bijbel Revelacion 21: 6-8. Si bo tin un problema den bo bida, no bay y no yama e bruhonan. Pero busca y bay na un Pastoor di bo Parokia of bay na un persona hopi spiritual den grupo di oracion, pa e resa cu bo, pa e papia cu bo, pa bo haya bon conseho y spiertamento spiritual. Hinka den bo mente, cu ta Cristo-Hesus ta E caminda, E berdad, E bida y nos destino final. Na tur esnan cu ta arepenti di nan actonan, bay na un Pastoor di Parokia, pa bo confesa bo pikanan mortal na Dios y pa bo por ta salba.
Seferino Tromp
