Na unda lo mi bay,for di bo Spirito?
Of na unda mi por huy bay for di bo presencia?
Si mi subi na cielo, Bo ta eynan, si mi habri mi cama den Seol , eynan tambe bo ta!
Si mi tuma hala di marduga, si mi bay biba den e partinan mas aleha di laman.
Ayanan tambe Bo man lo guiami,y Bo man drechi lo cohemi tene.( Salmo 139:7-10).
Ami ta e bon wardado, y mi conoce esnan cu ta di Mi esnan cu ta di Mi conoce Mi.(Juan 10-14).
Ami ta e bon wardado, e bon wardado ta duna su bida pa su carnenan ( Juan 10-11).
Pakico biba den rebeldia contra Dios, si e pas di Dios tey pa tur esnan cu ta kere den Dios.
Pakico cu gamble cu bida, si Cristo Hesus ta duna bida y bida na abundancia.
Pakico pretende di keda den maldad y mentira, si berdad ta haci hende liber.
Nos ta bibando den un tempo berdaderamente trabahoso, peligroso, yena cu malicia y inmoralidad, caminda respet mester bini bek den tur area, den tur cas.
No bira catibo of esclavo di e tempo aki, no acepta tur cos como normal, no coopera cu maldad y inhusticia , pero laga nos lanta firme, serio y dedica, y ban rescata y reconcilia hende cu Dios, pasobra ta pa esey nos a wordo yama, como esnan cu ta reconcilia hende cu Dios.
Nos tin cu mustra nos hubentud, hopi cla cu hopi seriedad, cu locual bo sembra bo ta cosecha si bo no arepenti y aparta, pa nan sa cu biba pa Cristo Hesus, no ta un bida bashi, pero ta un bida yena cu gracia y fabor di Dios.
Por ta nos poblacion tin cu bolbe wordo educa, cu alcohol y stuurmento no por cana hunto, si bo ta scohe pa bebe, anto no scohe pa stuur, pasobra alcohol ta subi na bo cabes y trece, un actuacion lento fisico pa bo,ta pone bo pia bira pisa, y bo mente no ta reacciona. Y esey ta causa accidente, ta causa hopi dolor, y tur esey por wordo evita si hende haci locual ta corecto.
Palabra di Dios ta bisa cu nos curpa ta Tempel di Spirito Santo, kende ta den boso,Kende boso tin di Dios, y cu boso no ta pertenece na boso mes.Pasobra boso a wordo cumpra pa un preis, pesey glorifica Dios den boso curpa.
Nos ta na bida, pasobra Dios a pone su Spirito den nos, pesey nos no por sconde pa Dios, unda cu nos ta , Dios sa na unda nos ta. Nos porta perdi pa hende, pero no perdi pa Dios, nos por sconde pa hende, pero ningun hende no por sconde pa Dios.
Tin hopi hacimento di wega, cu hende ta rechasa Dios y kere cu asina nan ta great, nan ta sabi, nan ta kere den nan mes, aunke esey ningun caminda den Bijbel e palabra di Dios, no ta bisa bo tin fe den bo mes, sino pa bo tin fe den Dios, y mantene bo fe den Dios.(Lesa Proverbionan 3:5-6).
Den Juan 3;16 e plan di salbacion di Dios pa henter mundo, ta sali na cla, pero den Juan 3:36 e advertencia pa rechaso di Cristo Hesus tambe ta sali na cla bisando: Esun cu kere den e Yiu tin bida eterno, ma esun cu no obedece e Yiu lo no mira bida, ma e furia di Dios ta keda riba dje.
Ora un hende kere den Cristo Hesus gratuitamente e ta haya Salbacion y yega na bida eterna.
Sinceramente, Pastor Marcel Balootje
