Idolatria a cuminsa for di tempo cu Moises a subi Sinai y e pueblo cu a mira cu e a tarda, a bisa Aaron su ruman pa traha un bishe di oro. ( Exodus capitulo 32.)
Bruheria a wordo demostra ora Moises a bishita Farao pa prome biaha y tabatin e asunto di e colebra y Garoti di Aaron.( Exodus 7:10-13.)
Practicamente tur clase di abominacion , bruheria y idolatria tabata for di principio, pasobra despues cu pica drenta mundo , tur clase di maldad a drenta.
Pero awendia cos a bira peor , pasobra di tur manera diabel ta purba ciega hende pa nan keda den scuridad.
Pasobra e palabra di Dios ta bisa den 2 Corintionan 11:14: no ta nada stranjo pasobra satanas mes ta disfrasa su mes na angel di lus.
Pa gara multitud di hende e diabel ta disfrasa na fiesta, pasobra hende no ta ripara ken ta e cabes di fiesta.
Pero tur hende mester tene na cuenta cu pa alaba Dios no tin mester di ningun disfras, tampoco nada cu ta spanta hende pasobra Dios ta lus y den dj’E no tin nada di scuridad.( 1 Juan 1:5).
Dios no ta deal cu idolatria, Dios ta un Dios bibo, Dios no tin nada di haber cu carpachi cu ta spanta mucha , pasobra Dios no ta hinca miedo den hende.
Palabra di Dios ta bisa bon cla cu Dios no a duna nos un spirito di miedo.( 2 Timoteo 1:7).
Hopi canal di telivision ta contamina cu pelicula diabolico, pasobra pelicula cu ta trasmiti asunto di mal spirito den cas di hende ta pelicula diabolico.
Mescos cu riba Facebook tin short videos of reels cu muchanan por wak riba nan telefon y bira malo, of ta cambia nan conducta.
Cuanto hende no ta keda malo, y cuanto mucha no ta wordo traumatisa, hopi no por drumi, y depende e efecto mental e cos ey por para te na psycoloog of psychiater.
Actualmente nos tin hopi problema di salud mental, y hopi no ta kere cu e cosnan aki ta bini door di metemento cu Bruheria y cosnan diabolico, pasobra ora bo mes habri e porta, e enemigo ta drenta.
Ora bo mes ta permiti fiesta di Halloween den bo cas, pasobra manera nan ta bisa , cu tur hende tin derechi di haci locual cu nan kier den nan cas, pero ora bo ta habri porta pa algo cu bo no conoce, despues di fiesta na unda bo ta bay cune?
Awendia tin hasta cierto tipo di movecion y baile cu ta idolatria y adoracion na Dios falso, y rond mundo nan tin clubnan y hende ta paga placa pa yama demonjo riba nan curpa.
Tambe tin tipo di meditacion, cu hopi hende ta cay aden pasobra nan hefe di trabao ta den ,nan tambe kier bay medita, yamando forsa diabolico riba na curpa, pensa cu asina ta keda jong, den forma, sabi, bon curpa, etc, y hopi mas bagamunderia.
E cos ta saliendo for di man y hopi hende ta keda pega den scuridad diabolico, pensando cu nan a avansa den sabiduria.
Awor un pregunta ta surgi: Si e cosnan ey tabata asina bon dicon e palabra di Dios ta bisa, cu esnan cu ta practica e cosnan aki lo no hereda e reino di Dios? ( Galationnan 5:19-21).
Dicon tin para scirbi den e buki di Revelacion 21:8 cu tur esnan cu ta haci magia y bruheria, y adorado di Dios falso lo wordo tira den e Lago di Candela, acaso Dios ta ekiboca Su mes?
Hesus Cristo ta Senjor.
Sinceramente, Pastor Marcel Balootje
