Tin hopi hende ta biba cu e pensamento robes cu Dios no ta rabia, y cu fierno no ta existi, bisando algo cu no ta scirbi ningun caminda den Bijbel, cu ta aki bao mes ta fierno.
Awel depende e tipo di bida cu hende ta biba cu e ta yama tera fierno, pero un hende cu tin Fe den Dios, cu tin Cristo Hesus como su Senjor y Salbador sabi bon, bon, cu aki bao no ta fierno.
Ban papia na prome lugar cu rabia y furia di Dios, pasobra furia ta hopi mas cu djis rabia.
Den Colosensenan 3:5-6 ta para scirbi: Pesey considera e miembronan di boso curpa terenal, como morto pa inmoralidad,impuresa, pasion, deseo malo, golosidad cu ta igual na idolatria. Pasobra ta pa motibo di e cosnan aki cu e furia di Dios lo bin riba e yuinan di desobedencia.
Den Romanonan 2 : 5 ta para scirbi : Ma pa motibo di bo capricho y bo curason cu no ta arepenti,bo ta montona furia pa bo mes, den e dia di furia y revelacion di e huicio di Dios.
Den Juan 3:36 ta para scirbi: Esun cu kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.
Ta para scirbi den Hebreonan 10: 26: Pasobra si nos sigi peca boluntariamente, despues di a ricibi e conocemento di e berdad, no a keda sacrificio pa pica mas. Sino un cierto expectaculo teribel di huicio,y e furia di un candela, cu lo caba cu e adversarionan.
Aki nan nos por mira te na unda bofon y desobedencia por hiba hende.
Pasobra ora nos ta mira un hende ta haci maldad, y pa mantene amistad cu e hende, nos ta prefera bay contra palabra di Dios pa complace hende, nos ta bira adversario di Dios, pasobra nos sa, pero nos ta reprende e persona.
Awor hopi hende ta bisa cu Fierno no ta existi, pasobra nan ta kere den fabula di hende y no den e palabra di Dios.
Den Lucas 16:18-31 fierno ta wordo presenta na tur hende, cla y raspa, pa asina ningun hende no bisa cu nan no tabata sa.
E buki di Judas 1:1-16 tambe ta duna varios splicacion di fierno.
E buki di Revelacion 20:11-15 ta bisa cu esnan cu nan nomber a wordo hanja scirbi den e buki di bida lo wordo tira den e lago di candela.
Juan 3;16 ta splica na unda esnan cu no ta kere den e Yiu unigenito lo bay, pasobra nan ta biba bao di condenacion.
Ta dos lugar tin un ta cielo y e otro ta fierno, pero tur dos ta depende di bo mes con bo ta biba, pasobra si bo biba leu for di Dios , mara na inmoralidad, pica y perversidad lo bo hereda morto eterno den candela di fierno, ma si bo biba cu un bon relacion cu Dios poniendo Cristo Hesus na prome lugar den bo bida, lo bo tin bida eterno den cielo. ( Juan 14:1-4).
Awor nos tur sa y ta compronde cu Dios ta rabia ( Numbernan 11;1-3), y su furia ta lanta y cu fierno ta existi, ( Mateo 13;36-43) ,pero tin un manera pa scapa di rabia y furia di Dios, esey ta door di arepenti di nos picanan y entrega nos bida na Cristo Hesus completamente y mantene un bon relacion cu Cristo y sigi perservera te na final.
Nos ta bibando den tempo trabahoso, no ta tempo di haci wega mas.
Sinceramente, Pastor Marcel Balootje
