Efesionan 2:8-9 ta bisa : Pasobra pa medio di gracia boso a wordo salba door di fe, esey no di boso mes, e ta e don di Dios, no como resultado di obranan pa ni un hende no gaba.
Cuanto hende awendia, no ta hanja e oportunidad den nan bida, pa stop cu locual nan ta haci cu ta malo pero ta sigi manera ta algo bon, of cu nan tin rason y derechi di hacie.
Tin hopi hende tanto homber como hende muher cu ta den inmoralidad, y cu sa masha bon, cu nan ta contra boluntad di Dios, cu nan ta traicionando nan yuinan, cu nan matrimonio ta na peliger y cu nan yuinan lo wordo traumatisa y desampara , pero toch ta sigi , manera ta un cos cu ta normal, y cu nan tin derechi pa hacie.
E curason halsa pensando cu ami ta bon, y cu ningun hende no tin nada di bisami, cu ami ta donjo di mi curpa y mi ta haci locual cu mi kier, ta un senjal cu scuridad ta dominando, y si no tin arepentimento e caida grandi ta bini y hopi biaha e caida di un ta nifica caida pa famia completo.
Bijbel cual ta e palabra di Dios ta avisa lo siguiente:
Romanonan 12:16-18 ta sinja nos: Sea di e mesun pensamento pa cu otro, no sea orguyoso den boso pensamento,ma asocia cu e humildenan, no kere boso mes sabi. Nunca paga malo cu malo na ningun hende. Respeta loke ta corecto den bista di tur hende. Si ta posibel, asina leu cu ta depende di boso, sea na pas cu tur hende.
Pasobra si un hende ta pensa cu e ta algo siendo cu e no ta nada, e ta ganja su mes.Ma laga cada un samina su mes obra,y e ora ey e lo tin motibo pa gaba solamente encuanto su mes y no encuanto un otro. Pasobra cada un lo carga su mes carga.( Galationan 6:3-4),
Pensamento egoista, orguyoso y amarga, den cual hende ta pensa cu nan tin derechi di pone otro sufri, den cual hende ta pensa grandesa, cu nan ta mas cu otro ta un pensamento di gran bobedad, pasobra dilanti di Dios nos tur ta igual.
Dios a traha hende den Su imagen y Su semehansa, awor si hende kier desvia, for di e pensamento, boluntad y principio di Dios, y kere y haci cosnan cu no ta agrada Dios , tur hende lo duna cuenta na Dios pa esey.
Y locual ta para scirbi den Romanonan 1:28-32 ta demostra na nos tur cu Dios ta regla cuenta cu hende ora nan ta na bida, pa demostra cu Dios tin poder riba bida di tur hende, cu ta Dios ta manda, y si no tin arepentimento e comportacion y rebeldia y rechaso di Dios lo hiba hende fierno.
Pasobra den ningun caso Dios no ta tolera ni tampoco acepta maldad, es mas pica no tin entrada dilanti di Dios, pasobra esun cu kere lo ta salba, y esun cu no kere lo ta condena, pasobra tur hende ta hanja e mesun oportunidad pa kere den eYiu di Dios.
E palabra di Dios,ta spierta nos hopi cla bisando: Laga tur amargura,furia, rabia,griteria y calumnia, wordo kita for di boso, hunto cu tur malisia, y sea carinjoso un cu otro, misericordioso, pordonando otro,mescos cu Dios den Cristo tambe a pordona boso.(Efesionan 4:31-32).
Aspira pa tin pas cu tur hende y tambe santificacion, sin cual ningun hende lo no mira Senjor.(Hebreonan 12:14),
Nos ta yama pa haci bon semper cu otro.
Sinceramente Pastor Marcel Balootje.
