E spirito di amargura ta move tur caminda, buscando pa ataca Matrimonio y Famia, pasobra amargura ta enemigo di tur matrimonio, famia, y organisacion especialmente ora nan ta basa riba e palabra di Dios.

Tin un guera declara pa satanas contra matrimonio y famia, pasobra matrimonio ta e base estableci pa Dios, pa multiplicacion di hende y tambe pa demostra e soberania di Dios riba mundo.

Tambe nos tin di tene bon cuenta cu no ta tur hende por duna conseho matrimonial, y asina evita cu hende amarga ta planta nan simia den bo bida matrimonial.

Hopi biaha nos no ta ripara con amargura por drenta, pasobra e ta sluip, y riba algo chikito e ta cuminsa crece manera un cancer, y si e no wordo trata na tempo e ta cubri henter e curpa, den e caso aki henter e matrimonio y famia, pasobra laga nos tene bon na cuenta, cu e ladron a bini pa horta, mata y destrui.

Den Hebreonan 12:15 ta para scirbi: Mira pa ningun hende no keda sin alcansa e gracia di Dios, pa ningun reis di amargura no spruit y causa problema.

Amargura ta bini door di falta di pordon cu hopi biaha un persona ta wordo insulta, of e ta insulta hende pero enbes di drecha e asunto ta prefera di wanta rabia aden.

Ora amargura drenta un matrimonio, e ta causa frialdad den relacion sexual, cual por hiba na adulterio. Amargura ta causa violencia relacional of domestico.

Amargura ta trece falta di interes pa cumpli cu debernan.

Amargura por causa abandono di hogar.

Hopi caso di stress y depresion ta wordo causa pa amargura.

Ora amargura ataca bo bida e tin cuatro sintoma, Rabia, Falta di pordon, Sin speransa, y Redo.

Tur e cuatro factor aki  hunto ta hiba hende na desesperacion.

Pasobra hende amarga ta facilmente envolvi den redo pasobra nan ta cana papia tur caminda locual a sosode cu nan buscando un razon,cu hopi biaha nan no tin pasobra ,nan no kier pordona.

Di otro banda nos tin cu mira cu un curason herida hopi biaha ta busca consuelo, y nos tur sa cu diabel ta disfrasa den tur cos, y tin hopi cu ta amarga cu ta busca nan consuelo den alcohol, droga y inmoralidad.

Amargura no ta haci wega y bo por ta amarga sin bo mes sa;

Por ehempel bo tin discucion imaginario den bo mente.

Bo ta facilmente ofendi.

Bo ta reacciona emocionalmente hopi  negativo ora cierto topiconan presenta.

Bo no kier pordona ni tampoco laga los di pasado.

Bo ta wanta rabia riba hende y busca manera pa haci nan daño.

Bo ta keha constant y tambe murmura.

Bo no ta agradecido pa cosnan bon den bo bida.

Bo ta desea malo pa esnan cu por a faya cu bo.

Bo ta culpa tur hende di bo problema.

Bo no ta papia nada positivo di otro hende, semper bo tin algo negativo di trece pa dilanti.

Pesey e palabra di Dios ta bisa nos pa especialmente den matrimonio y famia pa no laga solo baha riba boso rabia.No duna oportunidad na satanas y no lage cohe bentaha den nos hogar.( Efesionan 4:26+27)

Amargura por causa hende pa biba den scuridad.

Esun cu ta Odia su ruman ta den scuridad,y ta cana den scuridad, y e no sa unda e ta bay, pasobra e scuridad a ciega su wowonan.( 1 Juan 2:11)

Amargura ta contagioso, pa motibo di amargura Hose su rumannan a bende y Cain a mata Abel, aki nos por nota e daño cu amargura por haci den un Famia.

E cura of sanacion pa amargura ta, arepenti, pordona y biba pa Señor y asina mantene amargura leu.

Dios tene misericordia.

Sinceramente, Pastor Marcel Balootje,  

LEAVE A REPLY

Please enter your comment!
Please enter your name here