Un tempo pasa, nos tabata pensa con por ta posibel cu hende su amor pa Dios ta fria, con por ta posibel, cu hende no tin tempo pa Dios, of ta nenga di sirbi Dios pasobra nan tin cosnan mas importante pa haci pa nan mes, nan kier sirbi Dios manera nan kier, of nan ta bin cu e chiste moderno cu ta bisa cu cada ken tin nan Dios, y hopi historia mas cu ta demostra e frialdad inmenso cu ta reina, den asuntonan di Dios.
Pero no laga nos lubida locual ta para scirbi den Mateo 24:10-14:
Y na e tempo ey hopi lo trompica,y lo entrega otro y odia otro.
Y hopi profeta falso lo lanta,y lo ganja hopi hende.
Y pasobra inikidad lo aumenta amor di hopi hende lo fria.
Ma esun cu perservera te na fin, esey lo ta salba.
Y e evangelio di e reino lo wordo predica, den henter mundo como un tesumonio na tur nacion y e ora ey e fin lo yega.
Mira con maldad ta aumenta, hende ta haci malo, y keda para riba malo, te cu nan ta cuminsa kere cu ta bon nan ta haci, ley no ta wordo respeta.
Wak bon con gobiernonan ta yega na poder y despues nan no kier baha, ni maske cu nan perde eleccion, nan ta cuminsa hinca tur locual ta oposicion den prison, nan kier poder total, nan ta bay contra nan mes constitucion, nan no ta respeta ningun ley estableci den e pais, nan ta biba pa nan propio leynan , hasta trociendo e palabra di Dios y yena e pais cu idolatria y bruheria.
Hende a bira adorador di droga y alcohol, adorador di paranda, adorador di malicia y inmoralidad, ta parce manera hende no kier sali for di e bida di pica.
Awor ta e evangelio di Dios ta contra di nan, a bira cu mata un sirbido di Dios ta facil, pa asina sera su boca pasobra e ta cansa hende predicando e berdad.
No ta pornada ta para scirbi den Isaias 5:20-21 Bisando: Ay di esun cu ta yama loke ta malo bon, y loke ta bon malo,loke ta scuridad lus, y loke ta lus scuridad, loke ta marga dushi, y loke ta dushi, marga.
Ay di esnan cu ta sabi den nan mes wowo, y prudente den nan mes bista!
Y tambe for di e tempo ey a wordo profetisa: Ay di esnan cu ta campeon den bebemento di binja, y hombernan experto, den mesclamento di bibida sterki.( Isaias 5:22-23). Cu ta hustifica e malbado pa placa pasa bao di mesa, y ta kita derecho di esnan cu ta husto.
Esey ta nifica cu e aumento di buracheria, y corupcion cu tin rond mundo awendia a wordo profetisa miles di anja pasa cu e lo bay sosode.
Y den tempo trabahoso cu nos ta bibando aden,nos ta mira cosnan sosode, palabra di Dios ta cumpliendo, pa nos prepara pasobra e binida di Cristo Hesus ta serca, tin guera y rumor di guera rond mundo, Cristianismo ta wordo persigi rond mundo. Terorismo y matamento tur caminda, droga ta domina hasta caminda cu hende nunca por a pensa.
Awor mirando e maldad cu ta aumenta, no laga nos fria den nos amor pa Dios,
Haci esfuerso pa congrega den e cas di Dios.
Haci un esfuerso pa haci oracion especialmente hunto cu henter famia.
Haci un esfuerso pa ayuno y vigilia.
Haci un esfuerso pa sirbi Dios den e cas di Dios.
Haci un esfuerso pa Alaba y Glorifica Dios y biba pa Dios tur momento.
Sinceramente, Pastor Marcel Balootje
