Tur cos ta depende di e bida cu un hende ta hiba, mientras tanto cu e ta na bida , pasobra despues cu e muri nada no por wordo ahusta.
*Ta para scirbi den Hebreonan 9:27: Y mescos cu hende ta destina pa muri un biaha so, y despues di esaki ta bini huicio.
Ta fresco den tur hende su memoria, e oportunidad cu Dios ta duna pa salbacion, ofreciendo Su Yiu unigenito pa ken cu kere den dj”E no bay perdi ma haña bida eterna. ( Juan 3;16).
Esun cu kere den dj’E no ta condena, esun cu no ta kere den dj”e ta condena caba,pasobra e no a kere den e nomber di e Yiu unigenito di Dios.
Y esaki ta e condenacion cu e lus a bini den mundo, y hende a stima e scuridad, mas cu e lus , pasobra nan hechonan tabata malo.( Juan 3:18-19).
Tur locual un hende tin cu haci pa hereda bida eterna, e mester hacie awor cu e ta na bida, pasobra despues cu e persona muri, no tin garantia di ningun salbacion.
Y e no ta para scirbi ningun caminda den bijbel.Pasobra pa un hende arepenti y aparta di pica, y duna Cristo Hesus e prome lugar den su bida, ta un decision cu mester wordo tuma ora nos ta na bida.
Ningun hende no por biba pa otro, e ta un decision personal cu tur hende mester tuma ora cu nan ta na bida ( No lubida e historia di e rico y Lazaro( Lucas 16:19-31).
Romanonan 10:9 ta para scirbi: Cu si bo confesa cu bo boca, cu Hesus como Señor y kere den bo curason cu Dios a lant’E for di mortonan, lo bo ta salba.( Tene cuenta cu ta ora un hende por papia nan por confesa, y tambe nan mester tin tino pa nan kere, tur esaki ta indica cu bo mester ta na bida,
Pasobra cu curason hende ta kere pa haña husticia , y cu boca e ta confesa pa haña Salbacion.( Romanonan 10;10).
Pasobra pa medio di gracia boso a wordo salba door di Fe, y esey no di boso mes, e ta e don di Dios, no como resultado di obranan, pa ni un hende no gaba.
Ora un hende ta morto su Fe , no por funciona , ora un hende ta morto e no por ricibi Cristo Hesus den su curason , ta un desicion personal cu tur hende mester tuma ora nan ta na bida, y biba pe.
Si un hende no honra Dios cu su bida awor cu e ta na bida, no tin ningun speransa pe despues di morto.
Dios tene misericordia, pasobra tin hopi hende ta bay wordo decepciona, y tin hopi cu Señor lo bisa nan mi no conoce bo.
Pasobra biba den idolatria y kere cu bo ta salba, ta demostra cu bo no ta kere den e Yiu unigenito di Dios, ni tampoco bo no kier bandona e mundo y su scuridad.
Galationan 5:19-21 ta splica nos hopi cla ken lo hereda reino di Dios.No ta algo pa discuti pero ta algo pa kere y tene duro na dje, pa asina por tin cambio den nos bida, y nos por aparta di pica.
Hebreonan 12;14 ta recorda nos : Aspira pa tin pas cu tur hende,y santificacion sin cual ningun hende lo mira Señor. Si awe boso tende Su bos no endurece boso curason.
No laga ningun hende gaña boso, salbacion ta awor, den Cristo Hesus.
Sinceramente. Pastor Marcel Balootje.
