Segun Abogado Dello Gomez: Marko a actua robes dor di no sigui instruccion di autoridad
E mester tabata sa ken e señora ta
Relaciona cu detencion di Marko Espinoza dilanti ofcina di landsrecherche, abogado Dello Gomez a emiti un articulo riba su red social. E abogado ta bisa cu como periodista, Marko mester tabata sa ken e señora ta, sigur debi na e hecho cu desde mainta e ta sigui e caso y por a wak e señora rondona pa polisnan.
Segun Gomez a splica: Nos codigo penal ta stipula cu esun cu intencionalmente stroba un opsporingsambtenaar di haci su trabou of ignora un orden por “vorder” esaki si acaso e persona nenga e ta comete un delito castigabel cu un maximo di 3 luna of un boet. Cu Marco no sa ken e ta no ta cambia esaki. Sigur no si mirando cu 24ora tawata na Landsrecherche cubriendo un high profile case y di mainta e persona femenino (Hulandes) tawata involved cu e caso y e otro polisnan (local) no a actua contra e señora. Aki Marco por a faya a menos cu e ambtenaar no por ancra su actuacion riba un articulo specifico of si e persona si ta duna asistencia na Landsrecherhe pero e mes no tin bevoegdheid local.
Di otro banda un opsporingsambtenaar mester legitima su mes “ongevraagd” si e ta den “burgerkleding” a menos cu circumstancianan special ta preveni esaki. Aki e opsporingsambtenaar kisas por a faya. E lo mester hustifica esakinan. Si un polis ta den uniform no por pidie pa e legítima su mes pero mientras tanto mester cumplí cu orden di e polis den uniform.
Tur derecho fundamental incluyendo e libertad di expression cu prensa ta uza tin su limite. No laga un microphone of un camera lagabo pensa cu bo ta para riba ley. Di otro banda no laga un badge di polis tampoco subi bo cabes.
Pues, den opinion di Dello Gomez, tin algun factor pa tene cuenta cun’e, pero den liña grandi, nenga di sigui instruccion di autoridad, riba su mes ta un delito.
