Ta awor cu nos ta bida ta existi e oportunidad, pa drecha nos relacion cu Dios, pa ora morto presenta, nos por bay serca Señor.
Dios a duna tur hende oportunidad igual,pasobra Dios a stima e mundo completo, y a pone bida di Su Yiu disponibel pa pordon di nos picanan.
E plan di salbacion cu Dios ta ofrece na mundo henter, ta un muestra di amor, compasion y misericordia.pasobra e ta necesario, pa evita nos lo termina den fierno.
Cielo ta existi ( Juan 14:1-3).
Fiermo ta existi ( Lucas 16:19-31) (Revelacion 29:11-15).
Laga nos no biba den ignorancia di esey, pasobra e plan di e enemigo ta pa hende kere tur dia, cu tin suficiente tempo, cu nan por sigi biba manera nan kier, y no tene cuenta cu e palabra di Dios, pa asina cay den su gara, pa nan biba y muri sin Cristo Hesus.
E lucha di hende pa poder, pa rikesa, pa dominio riba otro, no ta nada mas cu algo temporal, pasobra e ta pasa bay manera biento, y si nos no tene cuenta nos ta keda atras , pasobra nos salbacion ta personal y e no ta mara na nada material.
Esun cu kere lo ta salba y esun cu no kere lo ta condena , pasobra e no a kere den e Yiu unigenito di Dios, y esey ta conta pa tur hende igual, no tin ningun hende cu tin un servicio special serca Dios, ta tur hende mester yega serca e Tata pa medio di Su Yiu Cristo Hesus, kende ta e caminda di e berdad y e bida.
Ta hopi distraicion tin pa kita hende su bista for di locual ta di Dios, ta hopi tentacion ta bini riba bida di hende, pesey Hesus ta bisa : Keda vigila y haci oracion,pa boso no cay den tentacion, e spirito ta boluntario ma e carni ta debil.( Mateo 26:41).
Dios a reconcilia su mes cu e mundo pa medio di Cristo Hesus (2 Corintionan 5:19).
Y si nos confesa nos picanan Dios ta fiel y husto di pordona nos, nos picanan y libra nos di tur inhusticia.(1 Juan 1:9).
Dios no kier pa ningun hende bay perdi pero pa tur hende yega na e conocemento di e berdad.
Hesus a bay nos dilanti y bay prepara lugar pa nos tur den cas di Su Tata.( Juan 14:1-3).
Hesus a bisa bin serca mi tur cu ta cansa y carga y lo mi duna boso sosiego ( Mateo 11:28).
Awor nos ta mira con e rechaso di Dios, bofon, cherchamento, inmoralidad ta aumentando mundialmente. falsedad, falta di respet, ta demostra na nos cu di berdad nos ta bibando den tempo trabahoso.
Hende kier biba pa nan mes,sin tene cuenta cu Dios, sin ningun speransa , pasobra nan no tin tempo pa Dios.
Bijbel ta splica,bon cla den Hebreonan 9:27: Y mescos cu hende ta destina pa muri un biaha so y depues di esaki ta bini huicio.
No straña boso di esaki, pasobra e ora lo yega den cual tur cu ta den graf lo tende Su bos y lo sali. Esnan cu haci bon pa resureccion di bida.y esnan cu a comete maldad, pa un resureccion di huisio.
Pero ora nos muri , tur nos rikesa, tur e cosnan cu nos ta gusta y stima lo keda atras , nos no por hiba nada cu nos.
Pesey nos mester entrega nos bida completamente na Cristo Hesus cual ta nos unico speransa pa bida eterna.
Salabacion ta un asunto personal, pa nos tur.
Sinceramente, Pastor Marcel Balootje
