For di algun dia caba Minister di Turismo, Transporte y Labor, mr. Wendrick Cicilia ta tuma nota di algun comentario y conseho rib’e crecemento di turismo pa cu Aruba. For di oposicion, ta tilda cu turismo ta conociendo un caida mientras cu di organisacion manera College Aruba financieel toezicht (CAFt) ta expresa nan preocupacion p’un posibel debilitacion den turismo pa e di dos mitar di aña 2025.
Minister Cicilia ta confirma cu turismo ta bayendo bon, berdad tin algun desaroyo cu ta monitoreando di cerca, por ehempel e tension geopolitico, por ehempel e conflicto entre Israel cu Iran pero te cu awo, Aruba no mester ta preocupa. Aruba no tin un rol den e conflicto pero si lo por sinti e efecto cu tempo. Oficina di turismo ya a raporta cu a base di e ultimo pronostico, e cantidad di turista pa Aruba lo por mustra un subida di minimo 5% na fin di aña 2025 pa cu ‘stay over arrivals’. Pa tur region ta mustrando un crecemento compara cu 2025, pues Merca, Latino America y Europa.
Aruba Tourism Authority (ATA) a indica cu e uzo di VISA a conoce un aumento di 8.8% compara cu e prome kwartaal di 2024. Segun ATA, e aumento ta representa un subida di 7% den cantidad di cardholder. No por laga afo cu e gasto di e usuarionan di VISA na Aruba durante nan estadia a crece cu 1.9% compara cu e mesun periodo na aña 2024.
Den mesun rosea, manera indica anteriormente, na Aeropuerto Internacional Reina Beatrix tambe lo conoce algun cambio. Apart cu ex-CEO di aeropuerto, James Fazzio lo ta bek pa un periodo corto pa yuda resolve e situacion di fila largo, AUA Airport ya a anuncia introduccion di e sistema nobo di ‘passanger flow control’ pa tur pasahero cu lo biaha pa Merca. E cambio aki a drenta na vigor desde 17 di juni 2025.
Entre tur e bon noticianan pa nos isla, ta bon pa remarca cu Aruba tabata anfitrion di e Platinum Associate Membership Advisory Council (PAMAC). PAMAC t’un conferencia caminda e ehecutivonan den e mundo di crucero a topa otro pa comparti vision y ideanan p’e destinacionnan rond mundo. Pa Aruba, e tabata un un evento importante mirando cu ta despues di ocho aña a organis’e bek na Aruba. Nos a ricibi e oportunidad pa demostra kico mas Aruba tin di ofrece. Apart di e atraccionnan nobo, pero tambe e ultimo desaroyonan riba nos isla.
Siguiendo cu bon noticia pa nos turismo, nos ta refleha bek riba un grandioso evento di Ban Bek Caya caminda turismo a integra cu comunidad den un solo evento. Ministerio di Turismo ta compremeti pa sigui sostene tipo di eventonan asina den futuro, caminda nos comerciantenan local ta ricibi e plataforma pa expone nan servicio y producto n’e publico presente. E proximo Bak Bek Caya lo e fin di siman aki, 27 di juni.
“Nos ta keda optimista pa e desaroyo di nos turismo, comunidad ya a expresa nan preocupacion di e cantidad di turista cu ta bishita nos isla. E idea ta pa sigui atrae e turista cu ta gasta mas riba nos isla pero esaki lo bay man den man cu e fortuna comparti. Nos hendenan tambe tin cu sinti e crecemento den nan cartera. Mi vision di ‘community-based tourism’ lo fortifica y inclui nos hendenan den e resultado di turismo”, asina Minister mr. Wendrick Cicilia a termina bisando.
