Ta tempo pa nos habri wowo y realisa cu:

Aunke cu zonido di maldad ta avansando, y cu inmoralidad cu kier penetra di tur forma den cas di hende, y hopi ta pensando kico nan ta bay haci cu nan yuinan, pa evita cu nan ta cay den gara di maldad.

Den tur circumstancia nos kier recorda bo cu aunke cuanto diabel, ronca y sapatia,ta para scirbi cu pa Dios nada lo ta imposibel ( Lucas 1:37).

Pero pa tur esnan cu no kier busca Dios y kier sigi den nan wega y pa tur esnan cu ta tras di droga, alcohol, y bida di paranda, iresponsabel den cuido di nan yuinan, cu si nan no tene cuenta, laga e bida di bagamunderia para, pronto segun cambio di leynan cu lo tuma lugar rond mundo, nan yuinan por  cay den man di hendenan cu nan lo no desea pa nan ta.

Awor kico lo pasa si bo yiu, cay den trampa di e malbado?

Kico lo pasa si bo yiu bisa bo, cu locual abo ta spera di dje, no ta locual e ta desea.?

Pasobra e enemigo ta un mentiroso, Senjor ta bisa constantemente, pa nos somete nos mes na Dios resisti e diabel y e lo huy for di boso.

E plan di e enemigo ta pa horta mata y destrui, pero Cristo Hesus a bini pa duna bida y bida na abundancia.

Den ningun circumstancia di bida bo no por permiti diabel horta bo yiu, for di bo, pasobra tur locual ta sosode awor aki ta pa kibra e nucleo familiar, pesey laga bo bandera di Fe y Oracion waya den bo cas mas cu nunca.

Awor ta conoci pa tur esnan cu ta kere den Dios y tur esnan cu pronto den un futuro sercano , lo busca Dios di henter nan curason. 

Pasobra manera cos ta birando, hopi cu tabata rechasa Dios den pasado awor lo bini na careda serca Dios, pasobra nan lo realisa cu Dios ta e unico caminda di refugio y fortalesa.

Pa Dios nada ta imposibel, locual e enemigo por kibra Señor tin tur poder y autoridad pa lante di nobo, si den nomber di Cristo Hesus , ciego por mira, lam por cana, y hasta morto por lanta, awel no tin ningun atake di diabel riba bida di hende, cu no por wordo destrui den nomber di Cristo Hesus.

Esaki ta un atake for di mundo di scuridad, y e ta para scirbi den Mateo 13:36-43, pesey nos mester lesa e palabra pa nos compronde bon locual,Cristo Hesus kier bisa nos.

E palabra di Dios ta cumpliendo pasobra e ta para scirbi den Lucas 21:36 : Ma sea alerta tur ora bay , haciendo oracion, pa boso por tin forsa pa scapa di tur e cosnan aki , cu ta bay tuma lugar , y para dilanti di e Yiu di hende. 

Nos ta keda para den nos oracion, pasobra solamente, pa medio di oracion nos lo vence,

E sistema di mundo lo bira dia, pa dia, peor, pero e poder di Dios lo aumenta dia pa dia, pasobra cielo y tera lo pasa, mas e palabra di Dios lo no pasa.

Mundo por cambia, pero nos Dios no ta cambia, Dios ta poderoso, e ta grandi, su poder no ta di compara cu nada aki na mundo.

Señor a priminti nos cu e lo ta cu nos te na final di tempo, pesey nos no por perde speransa, aunke cuanto maldad nos lo mira, pasobra nos Dios ta fiel y pa semper lo e ta fiel na su yuinan.

Sinceramente, Pastor Marcel Balootje.

LEAVE A REPLY

Please enter your comment!
Please enter your name here