Durante un rueda di prensa urgente, parlamentario Eduard Pieters di fraccion di PPA a expresa un preocupacion politico y constitucional fuerte relaciona cu Rijkswet HOFA y e Landsverordening Waarborging Overheidsfinanciën Aruba (LWHO). Segun Pieters, Aruba ta acercando un punto peligroso, unda manipulacion politico y falta di transparencia ta menasa directamente nos autonomia y nos derecho democratico como pais dentro di Reino Hulandes.
Presidente di Parlamento no por crea un consenso cu no existi
Pieters a reacciona fuerte riba e recien declaracionnan di presidente di Parlamento, cu a indica cu e gremionan comercial ta sostene HOFA. Segun Pieters, esey simplemente no ta corecto!
“Nos di PPA a sinta cu tanto e gremionan sindical como comercial y nunca nan a declara publicamente cu nan ta pro HOFA,” Pieters a enfatisa. “Despues cu Raad van Advies a confirma cu articulo 38 di Rijkswet y articulo 7.2 di e LWHO ta mina autonomia di pais y budgetrecht di Parlamento, ta incluso mas dificil ainda, pa comprende con algun hende ainda kier bende esaki como un ley cu tin sosten amplio.”
Raad van Advies a confirma loke PPA tabata advertiendo
Pa Pieters, e conseho di Raad van Advies di 24 april a cambia henter debate politico riba HOFA. Segun Pieters, loke PPA tabata bisando for di aña pasa, awor ta confirma oficialmente: e ley aki ta drenta den conflicto cu nos Staatsregeling y ta crea un riesgo real pa autonomia financiero di Aruba.
Mas ainda, Pieters a indica cu e propio LWHO no ta considera “cla” segun e conseho di Raad van Advies. “Pues mi no ta compronde, con Presidente di Parlamento y algun hende ainda ta purba convence pueblo cu e proceso aki ta normal y legitimo,” el a declara. “E producto legislativo no ta cla, no tin consenso y no tin e famoso ‘draagvlak’, esta e sosten amplio, cu ta referi na dje.”
13 sindicato a bolbe bisa: NO
Pieters a revela cu dia 13 di mei, 13 sindicato y gremio a bolbe confirma oficialmente nan posicion contra HOFA. Segun Pieters, esaki ta mustra claramente cu no tin ni sosten social ni sosten politico pa e ley aki.
“Parlamento nunca a vota riba Rijkswt HOFA. Pueblo no a duna mandato pa esaki. Sindicato no ta di acuerdo. E gremionan tin preocupacion serio. Pues con Presidente di parlamento por papia di ‘brede draagvlak’?” Pieters a cuestiona.
Unabes Aruba bisa si, nos ta perde control
Un di e advertencianan mas fuerte di Pieters tabata tocante e consecuencia constitutional di un eventual consenso di Aruba y aprobacion di Tweede Kamer. El a splica cu, basa riba articulo 15 te 18 di nos Statuto, unabes cu Aruba duna consenso y aproba LWHO, e decisionnan principal lo move pa Den Haag.
“E momento cu Parlamento bisa si, Aruba no tin ningun influencia mas y no tin nada mas di bisa,” Pieters a adverti. “Y si articulo 38 keda aden, nos tin un problema constitucional grave den Reino, paso ta mina directamente nos budgetrecht.”
Segun Pieters, esaki ta precisamente e motibo cu PPA a bay Hulanda pa informa miembronan di Tweede Kamer y Eerste Kamer personalmente cu e ley aki no tin legitimidad democratico na Aruba.
PPA ta exigi debate publico y claridad di coalicion
Pieters a critica tambe cu Presidente di Parlamento ainda no a yama e reunion publico cu fraccion di PPA y MEP a solicita desde 23 di maart, pa discuti posicion di coalicion riba Rijkswet HOFA y logicamente e ley mara na dje cu ta LWHO.
“Nos a manda rappel tras di rappel. Pero ainda no tin reunion,” Pieters a bisa. “Pueblo tin derecho di sa claramente, unda AVP y FUTURO ta para riba un ley cu hasta Raad van Advies ta cuestiona.”
Autonomia no ta algo pa negocia den silencio
Den su mensahe final, Pieters a enfatisa cu e lucha di PPA no ta contra Reino Hulandes, pero contra un proceso cu, segun e, ta ignorando principio democratico basico.
“Un consensusrijkswet sin consenso no tin legitimidad,” el a conclui. “Y autonomia di Aruba no por wordo entrega den silencio, ni door di presion politico, ni door di manipula informacion.”
