Directie Volksgezondheid (DVG) ta informa comunidad cu actualmente no tin ningun motibo di preocupacion pa Aruba relaciona cu hantavirus.
Hantavirus no ta un virus nobo. E virus aki ta conoci den sector medico internacional pa hopi aña. Recientemente a keda raporta na World Health Organisation (WHO) algun caso abordo di e cruise MV Hondius, loke a haci cu hopi informacion y preocupacion a cuminsa circula riba red social y otro plataformanan.
DVG ta informa cu pa Aruba no tin ningun menasa directo, e barco ta ubica leu for di Aruba y autoridadnan competente ta sigui monitor e situacion y ta eherciendo nan investigacion.
Hantavirus ta un zoonosis cu por wordo transmiti di animal pa hende door di contacto cu orina, feces of saliva di cierto tipo di animal rastrero manera raton infecta. Den mayoria di caso, e virus no ta transmiti facil di persona pa persona.
Actualmente no tin ningun caso registra na Aruba y animalnan rastrero manera raton y jaca na Aruba no tin e virus aki.
Directie Volksgezondheid ta sigui monitor constantemente tur desaroyo internacional y regional cu por tin impacto riba salud publico di Aruba manera e aumento di casonan di Keintura Geel, Chikungunya y Sarampi den diferente pais den region.
DVG ta trahando constantemente riba plannan di contingencia pa por responde liher si Aruba confronta algun situacion similar.
Pa loke ta hantavirus, comunidad por keda trankilo. Cu DVG ta monitor, sigui tur desaroyo y midi tur factor di riesgo relevante pa cu salud publico pa por proteha e bienestar di pueblo di Aruba.
Bo Salud, Nos PrioridadPa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw
