Regularmente Nos Historia Nos Herencia ta tuma nota cu instancianan oficial di Aruba ta cambia y of inventa nombernan nobo pa bocanan of sitionan na Aruba. Nos Historia Nos Herencia a ripara esaki tambe ta pasa cerca guianan turistico, cu mester sa mihor. Prensa en general tambe tin un rol importante pa menciona e nomber corecto y oficial di bocanan y sitionan na Aruba ora di presenta noticia y asina nos generacion hoben y nos Arubianonan nobo por siña e nombernan criollo y corecto. Ta bon pa menciona cu cada boca, marca den lama, bario y sitio na Aruba tin su mes un nomber caba. E nomber por ta na Papiamento of di origen indjan cual nos mester ta orguyoso di nan. Cada nomber ta bisa algo di e bario of boca y ta relata e historia di e sitio. Cambia un nomber existente ta un falta di respet pa nos antepasadonan y historia di Aruba.
Cada bes Nos Historia Nos Herencia ta tuma nota cu ta yama un bunita area di naturalesa pariba di Andicuri : “Blackstone beach”! E nomber corecto di e sitio ta Indjec of Boca di Indjec. No ta pasobra Google maps ta usa, incorectamente, e nomber “ Blackstone Beach “ esey kiermen cu e nomber ta corecto y nos mester usa e nomber aki manera galiña kloks. No tin ningun motibo pa cambia e nombernan di nos Aruba pa un nomber na Ingles, Hulandes of Español. Mescos ta conta cu algun hende ta usa incorectamente “ Sharkbay” pa un boca pabow di Andicuri. Su nomber original ta Boca di Cruz. Tin un motibo historico pa cu e nomber ey. No mester gaña turista cu eynan por wak tribon pa haya algun tips extra.
Ban rescata nombernan di nos Aruba.Ban tuma tempo cu mente habri y cuminsa educa nos mes cu nombernan original di nos barionan, bocanan y sitio. Den un proximo oportunidad Nos Historia Nos Herencia lo trece nombernan di boca y sitio cu ya caba a bai perdi. Pa cualkier hende cu ta desea di haya mas informacion di historia di Aruba, nombernan corecto di boca y barionan libremente por manda e-mail na robertocroes@hotmail.com of bishita e pagina di Facebook Nos Historia Nos Herencia. E esfuerso pa mantene nombernan original di sitionan di Aruba ta un tarea di nos tur.
