Prome pregunta: Ken ta un malbado? Awel un malbado ta un persona cu conscientemente of boluntariamente ta rebelde, ta ninga di obedece Dios, ta rechasa guia di Dios y ta sigi den su maldad y inmoralidad. Esey ta haci hende un malbado.
Awendia nos ta mira hopi hende cu actitud di un malbado, pasobra nan ta den sombra di scuridad, nan ta haci malo, nan ta cay sera, nan ta bolbe sali y sigi riba e mal paso sin nan sa kico nan haciendo cu nan bida.
Nos ta bibando den un mundo caminda maldad ta wordo aplaudi, y bondad ta pa hende cu no kier bay cu e tempo, pasobra nos tur ta mirando cu tempo ta trabahoso, y te ainda hopi no kier realisa cu ta tempo pa arepenti di pica, aparta for di pica y pone Cristo Hesus na prome lugar.
Si bo wak con hende ta trata Dios y Su palabra , ta parce manera palabra di Dios, ta un molester pa nan, y nan ta lubida cu Palabra di Dios ta trece bida y bida na abundancia.
Ora un hende ta persisti den maldad, ora un hende ta kere cu e tey pa semper y cu ningun hende no por move for di su sitio of posicion, e persona ey aunke cuanto placa, poder of sabiduria di mundo e tin, poco poco e ta perde mente y locura ta cuminsa drenta, esey ta locual a yega di pasa cu hopi malbado, pasobra nan ta lubida cu ta Dios ta donjo di tur cos.
No tin pas pa e malbado , Senjor ta bisa, pasobra esun cu kier kita pas di hende, Dios mes lo kita su pas.
Esun cu kier trastorna bida di hende, Dios mes lo trastorna su bida, pa e comprende cu ningun hende, ningun poder,ningun pais no ta mas fuerte cu Dios, pasobra Dios ta Todopoderoso.
Nos mester sinja nos yuinan for di chikito cu mester tin respet y temor pa Dios, pasobra tin momento cu hobennan ta haci cierto expresion, cu palabra fuerte cu ta demostra nan rechaso na Dios.
Tur hende cu rechasa Cristo Hesus conscientemente, y no a acepta e plan di salbacion cu Dios ta ofrece pa medio di Cristo Hesus , manera ta para scirbi den Juan 3:16, ta biba bao di condenacion.
Esey ta para scirbi bon cla den Juan 3;16-18. Pasobra salbacion ta personal, y no ta cuenta di ningun hende ta husga bo, pero ta bo mes ta dicidi, sea cu drenta den lus cu ta Cristo Hesus of bo kier sigi den scuridad.
Pero tin algo cu Dios ta bolbe recorda nos tur den Filipensenan 2:11 bisando: Cu pa e nomber di Hesus , tur rudia MESTER dobla,di esnan cu ta den cielo,riba tera y bao di tera, y cu tur lenga MESTER confesa cu Hesus Cristo ta Senjor, pa e Gloria di Dios Tata.
Ma e malbadonan ta manera laman bruto,cu no por keda trankil,y su awanan ta bira sushedad y lodo den laira.No tin pas pa e malbadonan mi Dios ta bisa. ( Isiaias 57:20-21)
No tin pas pa e malbadonan , Senjor ta bisa. ( Isaias 48:22).
Ay di esnan cu ta sconde nan plan , bon scondi pa Senjor, y cu ta haci nan obranan den un lugar scur, y nan ta bisa, Ken ta mira nos, of Ken conoce nos. (Isaias 29:13).
Pesey nos mester para fuerte como Famia den oracion, y no coopera cu maldad, ora nos yuinan ta haci malo, no sconde nada pa nan, pero hiba nan tur na arepentimento.
Sinceramente, Pastor Marcel Balootje
