Bijbel ta bisa bon cla, Cristo-Hesus a bini na mundo pa lanta un solo Iglesia Universal, pa salbacion di henter humanidad. Den Bijbel Exodo 24: 7 – 8, Dios Tata a sera e prome Aliansa cu e pueblo di Israel, pa medio di Mozes. Den Bijbel 2 Samuel 7: 16, Dios Tata a eligi David, pa bira e prome Rey di Israel y Dios Tata a priminti Rey David cu su sucesornan ( e pueblo di Israel ), cu nan lo ta pa semper encabesa e Reino di Dios. Akinan nos ta compronde, cu e pueblo di Israel ta e prome jama pa e Reino di Dios, pa medio di e prome Aliansa. Awor, den Testament Nobo, Dios Tata a manda Su Yiu Hesus, pa establece un Aliansa Nobo. Den Bijbel Mateo 26: 26 – 28, den Ultima Cena : “Durante comemento, Hesus a tuma e pan, a resa un bendicion, a kibra e pan y a dun’e na Su discipelnan bisando: Tuma come, esaki ta Mi Curpa. Despues di esey, E’l a tuma e copa y despues di a resa es accion di gracia, E’l a entrege na nan, diciendo : Boso tur bebe di esaki. Pasobra esaki ta Mi Sanger di e Aliansa cu ta derama pa hopi hende, pa pordon di pikanan.” E Aliansa Nobo aki di Cristo-Hesus, ta e Israel Nobo y e Herusalem Nobo di Dios Tata, pa mundo henter. Awor, den Bijbel Mateo 16: 15 – 19, Hesus ta duna e significacion di e Aliansa Nobo: “ Hesus ta puntra Su apostelnan: Anto boso mes, ta ken boso ta bisa Mi ta? Simon a contesta: Bo ta E Mesias. E Yiu di Dios bibo! Hesus a bis’e: Felis bo ta Simon yiu di Huan, pasobra no ta hende a revela bo esaki, ma Mi Tata cu ta den Cielo. Mi ta bisa bo: Abo ta Pedro (osea baranca) y riba es baranca aki, lo Mi lanta Mi Iglesia y forsanan di fierno lo no podera di dje. Lo Mi duna bo e yabinan di Reino di Cielo y loke bo prohibi na tera, ta prohibi den Cielo tambe y loke bo permiti na tera, lo ta permiti den Cielo tambe.” Awor nos por compronde, cu e Aliansa Nobo di Dios Tata, ta e Iglesia Universal cu Hesus a lanta pa medio di Pedro. E diabelnan di fierno lo lanta diferente sectanan y religionnan falso na mundo, pa desvia hendenan for di Iglesia Universal y for di nan salbacion. Hesus a duna Simon e nomber Pedro, cu ta significa baranca, pa dirigi Su Iglesia y cabes visibel di Iglesia Universal. Hesus a duna Pedro e yabinan di Reino di Cielo. E Iglesia Universal di Cristo-Hesus, ta e unico caminda y porta pa por drenta den e Reino di Dios. Y Pedro ta e cabes visibel di Iglesia Universal y Pedro tin e yabinan di Reino di Cielo y Hesus a duna Pedro e autoridad, di loke ta permiti y di loke ta prohibi den Iglesia. Den Bijbel Marco 16: 15 – 16, Hesus ta bisa Su apostelnan: “Sali pasa na henter mundo y predica e Evangelio pa henter humanidad.” E palabra di Hesus, sali pasa na henter mundo y predica e Evangelio pa henter humanidad, ta significa, Universal, Hesus Su Iglesia ta Universal y Universal ta significa, Catolico. Bijbel Lucas 13: 25 – 30, Hesus ta bisa: “Ami ta bisa boso, for di momento cu donjo di cas lanta sera porta, bosonan lo keda pafor y bosonan lo cuminsa bati na porta, bisando: Senjor, habri porta pa nos: pero E’l lo contesta boso: Mi no sa di unda bosonan ta bini. Anto bosonan lo cuminsa bisa: Nos a come y bebe hunto cu Bo y Bo a duna ensenjansa den nos plazanan. Pero E’l lo contesta: Mi no sa di unda bosonan ta bini. Bai for di Mi, tur hacidornan di maldadnan, eynan lo tin yoramento y mordemento di diente. Ora bosonan mira Abraham, Isaac, Jacob y tur e Profetanan den Reino di Dios, mientras bosonan lo ta tira pafor. Y lo bini hendenan di Oriente y di West, di Noord y di Zuid, pa tuma parti na e fiesta den Reino di Dios. Corda bon, esnan cu awor ta di ultimo, nan lo ta di prome y esnan cu awor ta di prome, nan lo ta di ultimo.” Hesus ta bisa, ora bosonan mira Abraham, Isaac, Jacob y tur e Profetanan den e Reino di Dios, esaki ta e hudiwnan y e Profetanan den e prome Aliansa. Hesus ta bisa, cu lo bini hendenan di Oriente y di West, di Noord y di Zuid, pa tuma parti na e fiesta den Reino di Dios. Esaki ta e hendenan di henter mundo, cu a acepta e Aliansa Nobo di Dios Tata y cu a drenta den e Iglesia Universal di Cristo-Hesus. Den Bijbel Marco 16: 15 – 16, Hesus ta bisa bon cla na Su apostelnan: “Pasa rond di mundo y predica e bon noticia pa henter humnidad. Esnan cu kere y ta bautisa lo ta salba, ma esnan cu no ta kere, nan lo ta condena.” Compronde bon, esnan cu no ta kere y cu no ta acepta Cristo-Hesus Su doctrinanan, Su Sacramentonan y cu no ta bautisa den Iglesia Universal di Cristo-Hesus, nan lo ta condena. Pesey ora Hesus a bisa, cu porta di Reino lo sera pa bosonan y bosonan lo keda pafor y eynan lo tin yoramento y mordemento di diente. Esey ta esnan cu no a acepta e Aliansa Nobo di Dios Tata y cu no a acepta e Iglesia Universal di Cristo-Hesus. Esnan di prome yama, lo ta di ultimo. Esaki ta e Hudiwnan di Israel, cu no a acepta e Aliansa Nobo di Dios Tata y cu no a acepta e Iglesia Universal di Cristo-Hesus, nan lo no drenta den Reino di Dios. Esnan di ultimo, lo ta di prome. Esaki ta e Hudiwnan y tur esnan na mundo, cu a acepta e Aliansa Nobo di Dios Tata y cu a drenta y a bautisa den e Iglesia Universal di Cristo-Hesus, nan lo drenta den e Reino di Dios. E Aliansa Nobo di Dios Tata, ta e Israel Nobo Universal Catolico di Cristo-Hesus, ta sigi encabesa e Reino di Dios, Bijbel 2 Samuel 7: 16. Hesus ta Catolico.
