Aunke bida por bira duro, aunke tempo por bira scur, aunke necesidad por drenta cas, aunke soledad por ataka, no wak atras y bay bek for di unda Dios a saca bo.
No bay bek den parandiamento,
No bay bek den alcoholismo y droga,
No bay bek den relacion toxico y abusador djis pa bo hanja placa.
No bay bek den relacion cu hende narcista, y bo sa masha bon cu nan no ta stima bo.
No bay bek den amistad cu hende hipocrita, traidor, sin gevoel, djis pa bo ta den ambiente.
No tene man cu wolf (lobo) bisti na carne.
No bay bek den relacion inmoral cu ta destrui bo matrimonio.
No bay bek den relacion caminda bo ta wordo usa sexualmente, pero no tin respet, ni responsabilidad.
No tene man cu hende malvado y perverso. Cu no tin temor di Dios.
No bende bo mes pa placa.
No sinta na mesa cu malbadonan, hende envidioso cu solamente ta pensa riba nan mes.
No drenta bek den amistad cu hende cu ta cana cu arma y no ta respeta ley,
No drenta bek den ningun relacion cu bruheria y obranan di scuridad.
Corda locual Senjor bo Dios ta bisa: No tene miedo pasobra Mi ta cu bo, No desmaya pasobra Mi ta bo Dios.Lo Mi fortalese bo . Si lo Mi yuda bo si lo Mi sostenebo cu Mi man drechi di husticia.( Isaias 41:10).
No lubida e bondad di Dios.
No lubida for di unda Dios a sacabo.
No lubida locual Dios a haci pa bo.
Materialismo y golosidad pa placa y fama, hopi biaha ta pone hende lubida riba Dios, lubida riba nan famia, y nan hogar.
Y esnan cu conoce Bo nomber lo pone nan confiansa den Bo, pasobra Abo Senjor no a bandona esnan cu ta busca Bo.( Salmo 9:10).
Sirbi Dios cu un curason completamente dedica na Dios, para firme, tin hopi tentacion ta bay rond, tin hopi distraicion, tin hopi mentira, tin hopi maldad disfrasa na cosnan bunita, pero ningun di nan no por iguala e amor y misericordia di Dios.
Bendiciona Senjor O mi alma, y no lubida ni un di su beneficionan.( Salmo 103:2).
Ma Hesus a bisa ningun cu ta pone man na ploeg, y ta wak patras no ta apto pa e reino di Dios.( Lucas 9:62).
Rumannan , mi no ta pretende cu mi mes a gare caba, ma un cos mi ta haci, lubidando loke ta keda atras,y aspirando na loke ta dilanti, mi ta haci tur esfuerso pa alcansa e meta, pa hanja e premio di e yamada celestial di Dios den Cristo Hesus.( Filipensenan 3;13-14).
Pasobra nos tambe un tempo tabata ignorante, desobedecido,ganja, sclavisa na varios pasion y placer,bibando den malisia y envidia,odioso,y odiando otro. Ma ora e carinjo di Dios nos Salbador y su amor pa humanidad a parece,E a salba nos no a base di obranan, cu nos a haci den husticia, ma segun su mes misericordia,pa medio di e labamento di regeneracion,y renobacion pa medio di Spirito Santo.Kende e a basha ricamente riba nos pa medio di Hesus Cristo nos Salbador.
Cristo Hesus ta e lus di mundo, pasobra E a saca nos for di scuridad y trece nos na Su lus.
Ta un berguensa ora un hende tin cu bay bek, den cosnan feros, den cual Dios a libre for di dje, pasobra palabra di Dios ta bisa cu Dios no ta tenta ningun hende.( Santiago 1:13).
Laga nos pidi Dios di henter nos curason pa warda nos leu for di tur tentacion.
Sincermente, Pastor Marcel Balootje
