Administracion Nacional Oceanico y Atmosferico di Merca awor ta kere cu tin un probabilidad di 60% unda e temporada di horcan Atlantico lo presenta un nivel di actividad “above normal”. Ta spera cu lo tin entre 14 y 21 tormenta tropical nombra y te cu 11 horcan.
E aña aki, 10 di augustus, e Administracion Nacional Oceanico y Atmosferico (NOAA) di Merca a publica un buletin nobo cu su prediccionnan pa e temporada di horcan Atlantico di e aña aki. Segun su ultimo datonan, ta bira mas y mas probabel cu e temporada aki, cu lo bay te fin di november, lo tin un nivel di actividad mas halto cu normal.
E ULTIMO update di NOAA tabata na mei di e aña aki y na e momento ey nan a afirma cu tabatin un probabilidad di 30% cu e temporada di horcan lo tabatin un nivel di actividad “above normal”. E ultimo boletin di 10 di augustus, e entidad a informa den un comunicado, ta indica cu e probabilidad awor ta 60 %.
Ademas, a determina cu e probabilidad cu tin un aktividad serca di normal a baha na 25%, compara ku 40% na mei. “E update nobo aki ta duna Atlantico un chens di 15% pa mira un temporada “bajo normal”, NOAA a agrega.
“E factornan climatico principal cu ta spera di influencia e actividad di horcan di Atlantico 2023 ta El Niño y e situacion cayente di e Oscilacion Multidecenal di Atlantico, incluyendo e temperaturanan record di superficie di lama Atlantico”, Matthew Rosencrans, e meteorólogo principal di e temporada di horcan di e Centro di Prediccion Climatico di NOAA, a splica den e comunicado. “Teniendo na cuenta e factornan aki, e perspectivanan actualisa ta mustra mas actividad, pa cual nos tur ta urgi pa prepara awor pa e continuacion di e temporada”.
Te na e momento aki, e entidad mericano ta pronostica cu lo tin entre 14 y 21 tormenta cu nomber (biento di 62 kilometer pa ora of mas), di cual entre 6 y 11 lo por bira horcan (biento di 119 km/h of mas). Di nan, 2 te 5 por bira horcan di gran intensidad (biento di 179 km/h of mas).
Normalmente un temporada di horcan “promedio” ta produsí 14 tormenta cu ta haya nomber, di cual 7 ta bira horcan, incluyendo 3 horcan grandi. Te awor, a registra 5 tormenta tropikal, incluyendo 1 cu a bira horcan.
Meteorologonan di NOAA ta kere cu “ta probable cu e condicionnan oceanico y atmosferico actual, manera e temperaturanan record di superficie di laman Den Atlantico, ta contrasta e condicionnan atmosferico habitualmente limita asocia cu e fenomeno actual di El Niño”, e comunicado a indica.
