E recibo a yega! Mas di cinco miyon florin: esey ta e cantidad cu Web y Elmar tin cu paga den interes extra, despues cu cambio di comisario y director a wordo haci sin sigui reglanan stipula.
Apenas Dowers a drenta Gobierno, el’a cambia comisario den companianan di utilidad y nombra contra tur regla, hasta contra acuerdo di gobernacion, tres comisario.
E decision aki, ta obra di Arthur Dowers y Baba Herde, kendenan a crea desconfiansa na e banconan. Banconan no a duna permiso y esey a yega awor na causa un nivel di interes mas halto pa e empresa estatal.
Awor, pueblo ta haye cu e cuenta. E gasto aki ta stroba e servicio, operacion y hasta por subi tarifa di awa y coriente.
Un persona na altura a bisa: “Si nan a crea e problema, nan mester paga, no pueblo.”
Gerlien Croes tambe ta responsabel pa e situacion aki. El’a priminti cu tur nombracion lo pasa Conseho di Minister, pero Geoffrey a admiti cu ningun a pasa den Ministerraad. Pues AVP a viola e acuerdo di gobernacion, pero Futuro a keda boca keto.
Den un comunicado di Partido MEP, nan informa cu awor tin cobransa di extra 5 miyon florin pa nan mal decision.
Ken tin cu paga awor ? Gerlien, Dowers y Baba Herde mester asumi nan responsabilidad y nan mester paga for di nan propio saco pa nan error.
Solo di Pueblo lo sigui ta vigilante.
