Ora nos kita nos bista for di riba Dios, nos ta manera un barco sin capitan y sin rumbo. Pasobra Dios ta nos unico speransa specialmente den e tempo trabahoso cu mundo ta bibando aden.
E unico sosten cu nos tin ta Dios, e ta cu nos 24/7 aunke nos no ta mira Dios, Su presencia ta cu nos.
Proverbionan 17 : 3 ta bisa nos: Wea pa dirti metal ta pa plata, fornu ta pa oro, ma ta Senjor ta sonda curason.
Hende por sconde hopi cos pero e no por sconde su curazon pa Dios, pasobra Dios ta e unico cu por wak den curason di hende, y pesey Dios sa bon ken ta esnan cu ta confia den dj’E,
Confia den Senjor cu henter bo curason, y no depende riba bo mes comprendemento, Den tur bo camindanan reconoce y E lo dirigi bo berehanan.( Proverbionan 3:5-6).
Ta tristo mira cuanto hende ta confia den material, den cosnan temporal, ta bringa cu otro pa cos cu nan no por bay ningun caminda cune, pasobra ora hende muri nan no por bay cu nada.
Hende ta bringa cu otro dilanti di huez pa kita yiu for di otro, famia ta bringa pa kita cas for di famia, un cas cu ta nan antepasado a traha y cu nan no tin ni un cen preto hinca den dje.
Tur esaki ta pasa ora hende perde nan confiansa den Dios y pone nan bista riba material.
Tin cu ta confia den garoshi, otro den cabay, ma nos ta confia den e nomber di Senjor nos Dios.Nan ta trompica y cay, ma nos a lanta y keda riba pia.( Salmo 20:7-8).
Ta hopi bunita ora mayor sinja nan yiu pa confia den Senjor, pasobra esey lo duna e mucha un futuro briyante, pasobra su dependencia ta riba Dios, e no ta depende riba su mes.
David a confia y depende di Dios y a derota Goliat.
Moises a confia y depende riba Dios y Laman Cora a habri.
Daniel a confia y depende riba Dios y Dios a manda un angel sera boca di leon.
E iglesia a confia y haci oracion, y Dios a libera Pedro di prison.
Tur cos cu nos confia Dios cune ta bira exitoso, pasobra Dios ta Todopoderoso.
Confia Dios cu bo matrimonio awe, mayan cu Dios kier felicidad ta bati na bo porta.
Si bo confia Dios cu bo yuinan, bo por tin sigur cu nan lo cana riba bon caminda.
Confia Dios cu bo negoshi, lo bo no tin perdida.
Y esnan cu conoce Bo nomber lo pone nan confiansa den Bo, Pasobra Abo O Senjor , no a bandona esnan cu ta busca Bo.( Salmo 9:10).
Un cos nos por tin sigur cu Senjor nunca lo bandona nos, ni tampoco laga nos desampara.
Awor cu e Dios di speransa,yena boso,cu tur goso,y pas den keremento, pa boso por abunda den speransa pa medio di e poder di Spirito Santo.( Romanonan 15:13).
Lo Bo warda den pas perfecto, esun cu su pensamento ta permanese den Bo, pasobra e ta confia den Bo, Confia den Senjor pa semper pasobra den Dios e Senjor nos tin un Baranca eterno.( Isaias 26:3-4).
Nos tin di reconoce cu nos crecemento Spiritual ta aumenta a base di e confiansa cu nos tin den Dios, pasobra humildad lo prevalece tur momento den nos bida pasobra nos ta confia den Dios.
Ta un previlegio pa confia den Dios, ta un honor pa nos ta den Su presencia, pasobra nos Senjor ta bon nos Senjor ta fiel y berdadero. Sinceramente, Pastor Marcel Balootje
