E ultimo simannan e panorama di acontecimentonan politico na nivel mundial a conoce hopi posicionnan straño y cualnan ta pone hende pensa cu nan ta sali for di mentenan di politiconan hopi bruha. Tambe tin posicionnan hopi bon na defensa di un mundo mihor.
Na Israel, Israel a gana e trofeo pa asesina mas tanto hende inocente di cual mayoria ta muchanan y muhernan, mientras nan meta pa gana e guera tabata y ta e destruccion di Hamas, cual tampoco lo ser cumpli. Hasta generalnan di e ehercito Israeli ta bisa cu Hamas no por ser destrui. Por ta e final di e gueranan ta crea situacionnan straño, confuso, desespera y bruha.
E resolucion pa paz na Gaza, di Israel segun Merca, pero cu Israel mes ta rechasa.
Cu hopi tamtam Merca a trece un proposicion di Paz na Gaza den CSNU (Conseho di Seguridad di Nacionnan Uni), cual a ser accepta algun siman atras. Un desicion di CSNU mester ser respeta pa mundo completo. Presidente di Merca Biden na varios ocacion a bisa cu e resolucion ta di Israel y Merca den nomber di Israel ta trece den CSNU. Biden cada biaha ta bisa cu Hamas mester accepta e resolucion y tin paz na GAZA. UN postura hopi straño manera ta ser bisa, pasobra semper Merca a actua como abogado di Israel, pa e tantisimo biahanan cu Merca a defende violacionnan di derechonan humano y otro actonan ilegal di Israel. Aserca Merca ta Polis y Militar pa Israel dor di e tantisimo biahanan cu nan policialmente y militarmente a defende Israel, aserca ta Merca ta regala Israel e bomnan cualnan a causa banda di 40 mil morto, entrenan mayoria muchanan.
Awor Merca ta yama su mes “e misionero di paz” cu un resolucion cu Biden ta bisa, ta di Israel. Esaki a crea un confusion grandi, pasobra despues di acceptacion di e proposicion den CSNU, e doño di e resolucion, esta Israel, toch ta sigui cu su bombardeonan pa mata muchanan y hende grandi. Puntrando e prome-ministro di Israel, esaki ta bisa cu Israel no ta di acuerdo cu e resolucion di CSNU. Increibel, e resolucion ta di Israel, pero nan no ta di acuerdo cune. Netanyahu a bisa, un acuerdo di paz ta bini ora cu Hamas ta ser destrui completamente.
Hamas a ripiti su posicion cu 3 punto esensial. Prome, pa nan paz ta bini ora Israel ta saca tur su militarnan for di Gaza, cual ta teritorio Palestino, no di Israel.
Di dos e Tregua mester ta permanente, no manera esun di biaha pasa, ora cu despues di algun siman, Israel a sigui mata hende grandi y mucha cu su bombardeonan.
Di 3, Hamas ta exigi pa Rusia y China tambe ta e paisnan cu ta para garantia pa e tregua wordo cumpli.
Biden, ni Blinken no kier papia mas ariba e resolucion di Israel cu Israel mes no ta di acuerdo cu ne. Tur cos, bombardeo, tiramente entre soldanan di Israel y e guereronan di Hamas ta sigui manera nada no a pasa. Tin un resolucion di CSNU, pero no ta wordo cumpli y e pais poderoso cu a trece e resolucion no ta pone su poder tras di e desicion pa e Tregua wordo cumpli.
Despues cu Merca na tur ocacion ta bisa cu nan kier un tregua, pa ningun ser humano inocente muri mas den e guera aki, toch na 3 ocacion ta uza su veto y vota contra. Igualmente cada biaha Biden y Blinken ta bisa cu Merca ta na fabor di formacion di un estado Palestina pa soluciona e problema na Medio-Oriente. Pero ora yega e momento pa vota pa e estado Palestina den CSNU, Merca ta vota contra. Pesey chistosamente Merca ta wordo yama “NOS SI TAMBE TA NO”.
Merca ta sigui cu su posicionnan hipocrita, cu un politica sushi y bruha na e nivel mas halto di nos sistema legal, esta den CSNU
IDF cu un tregua durante un periodo entre 8’or di mainta y 7’or di anochi, pero rechasa.
Algun dia pasa a sali e noticia, cu Hamas ta fuertemente para. Nan ta bataya den e parti nort, na Rafah y na otro lugarnan di Gaza y nan a asesina 8 solda Israeli ariba un dia, siman cu a pasa, tambe cu 70 mil solda di Israel no por sigui den e guera pa motibo di heridanan grave ricibi y hopi solda cu problemanan mental.
Liderasgo di IDF, esta e ehercito Israeli a haci dos pronunciamento.
Prome, segun vocero di IDF, cu Hamas no por ser destrui, ya cu Hamas ta un partido Politico ancra den e Palestinonan na Gaza, bo ta mata dies, pero ta nace mil guerero.
Di dos IDF ta declara cu diariamente nan lo tene un tregua for di 8’or di mainta te 7’or di anochi. Nan a duna dos motibo, uno pa ayudo humanitario por drenta mas mihor den Gaza y di dos e falta di militarnan.
E dos ministronan zionista, ultra derechista den e gobierno Israeli, Bezalel Smotrich y Itamar Ben-Gvir a rebeldia y a pone posicion pa Netanyahu cambia e desicion di IDF. Nan y Netanyahu despues a bisa cu ta gobierno ta tuma desicion, no IDF.
Merca ta apoya e dos posicionnan tuma dor di IDF, pero ta Netanyahu cu su ministronan zionista radical ta dicidi e rumbo di e guera y Merca mester percura pa e bomnan y otro armanan pa Israel.
Netanyahu cu pleitu cu tur hende ront di dje.
Despues di ta bringa contra Hamas y por bisa perde, ya cu Hamas no por ser destrui y mundo completo ta papia di un estado Palestino. Netanyahu a bringa contra oposicion na Israel y nan a sali for di e gobierno nacional pa hiba e guera, despues otro lucha interno contra e mando militar. Tambe tin e lucha contra gobierno di Merca, mas bien contra Biden y Blinken. Maske e lucha aki Netanyahu ta controla 100%, pasobra e lobby di hudiunan ricu na Merca, AIPAC, cu biyonnan di dollarnan ta controla casi tur e politiconan na Merca. Awor Netanyahu tin acusacionnan fuerte contra e zionistanan ultra derechista, Bezalel Smotrich y Itamar Ben-Gvir. Pues su base di apoyo ta birando mas chikito y si sigui asina, un ora pa otro e ta para su so sin gobierno.
Nethanyahu ta astuto, awor e buscando un guera cu Hezbollah na Libanon. E sa cu e guera contra Hamas ta perdi pa Israel y pesey e mester amplia e guera na Libanon, pero e no tin bastante militar pa e guera aki, pesey e ta buscando apoyo.
Guera na Libanon cu Hezbollah y un bishita mahos di Netanyahu na congreso di Merca.
Pronto dentro di algun siman Netanyahu mes lo bay tira un discurso den Congreso Mericano invita pa e presidente di Congreso, no di presidente Biden, kibrando tur regla protocolar.
Netanyhu ta un convicto di ICC (International Criminal Court), cual corte kier su detencion y manda Den Haag pa wordo husga. Contrali na esaki Merca ta saca su carpeta cora pa ricibi cu tur honor Netanyahu, un psicopata.
Hopi mahos pa Merca, e pais cu ta bati ariba su pecho di ta e campion mundial den democracia y den respet pa derechonan humano, pero kico ta pasando akinan: Un presidente cu ta cometiendo genocidio contra Palestinonan. Mundo completo ta wak con Israel/Netanyahu ta matando muchanan y hende grandi inocente, bibu y directo via medianan di informacion. Dor di esaki Netanyahu a bira un convicto di ICC y sigur, ta e persona mas odia awendia na mundo.
Un siñal malo na global south, si Israel por mata na gran escala Palestinanan inocente cu apoyo di bomnan Mericano, nan por haci esaki tur caminda di mundo.
Hopi mahos pa Merca, pero Netanyahu ta haci lo maximo pa hinca Merca den e conflicto aki. Esey ta e meta di su viahe pa congreso Mericano y pa Merca bringa su guera contra Hezbollah.
Nasrallah e lider maximo di Hezbollah a adverti Israel cu su poderio militar ta pone Israel completo den peliger. Su algun cienmil di dronenan y misilnan por yega tur parti di Israel.
Siman pasa un drone di Hezbollah a drenta espacio aereo di Israel, violando y pasando e sistema anti-aereo di Israel, “Iron Dome” y bay pasa ariba Haifa, un ciudad grandi sacando potret di e lugarnan mas vital di e ciudad y pa despues manda potret pa gobierno di Israel, bisando cu esakinan ta e blanconan si guera start.
Saudi Arabia no ta prolonga e acuerdo Petro-Dolar.
E acuerdo tocante e Petro-Dollar a termina 9 juni 2024. MBS (MohamedBin Salman), e principe heredero di Saudi Arabia, no a renoba e acuerdo.
Saudi Arabia a anuncia cu nan no ta renoba e acuerdo di Petro-Dollar di juni 1974, den cual e prijs di Petroli Saudi ta ser determina den dollar. Tambe e acuerdo ta ensera cu Merca lo percura pa e seguridad di Saudi Arabia. Sigur un sla pa e dollar.
Motibonan no a ser duna, pero sigur e tin di haber cu e guera na Gaza, aserca e posicion di Saudi Arabia pa crea e Estado Palestino, segun e acuerdo di Nacionnan Uni di 1948. Tambe e motibo por ta pa nan sigui e politica di BRICS.
Tambe e debenan grandisimo di e gobierno Mericano (dollar), banda di 34 triyon di dollarnan.
Trump culpabel, segun un Jury, por bay sera y bira presidente di Merca.
E candidato pa presidente di Merca a ser haya culpabel dor di un Jury, consistiendo di 12 persona ariba tur e casonan treci contra dje den e investigacion criminal den un corte na New York City.
Un Jury di 12 persona unanimamente a haye culpabel ariba 34 asuntonan di falsificacion. Dia 11 juli proximo lo e tende su castigo. Corte a tende como 22 testigonan ariba e 34 casonan di falsificacion.
Donald Trump ta sigui cu su campaña politico pa bira presidente, obviamente e ta un populista cu un reputacion cual no ta esun mas bunita, e ta inpredicible y tin un caracter un poco negativo, pero e ta hopi popular politicamente na Merca, dilanti den tur encuesta.
Segun Trump e ta un prisonero politico y ta e politiconan di partido democrata ta persigui su persona y hasta e por bay sera.
Ansiosamente tur hende ta warda e sentencia. Si Trump cay sera esey no kier meen cu e no por ser eligi, ni tampoco bira presidente di Merca.
E lo ta un fayo grandi si pa Merca y mundo occidente, con cu nos wak e.
Esnan cu ta apoya Trump ta bisa cu e veredicto lo pone Trump crece mas den e campaña electoral, na Merca tur cos ta posibel cu Trump, e tin un apoyo grandi.
Bo no por bisa nada, pero e situacion ta bira interesante si, ya cu e elitenan na Merca no ta gusta cu nan presidente ta un convicto di e sistema hudicial di Merca mes. Tin bosnan ya a cuminsa papia pa no laga e situacion yega di e lew ey
Diferente scenarionan ta den discusion, uno ta cu Trump ta hala aden su candidatura y ta elimina tur caso penal contra dje, pero e problema ta e constitucion mericano y su leynan.
E ruta legal pa impedi cu e ta yega na ser eligi tambe ta mustra un caminda cu hopi obstaculo.
11 Di juli ta bira un dia cu hopi espectativa.
Hecho memorabel, hobennan ta demonstra contra Israel.
Increibel pero den e mundo bruha di awendia tur cos ta posibel. Merca cu su apoyo total na tur e abusonan di Israel, for di 1948 te awe, contra e pueblo di Palestina.
Anto awe nos ta wak con na Universidadnan Mericano y tambe na Europa, Hobennan ta envolvi den demonstracionnan grandisimo na fabor di Palestina. Haci mi corda 50 pa 60 pasa den mi juventud e marchanan grandi na hopi parti di mundo, contra e guera di Merca na Vietnam y cual a resulta den un derota pa Merca.
Tur cos ta indica cu Israel y Merca ta bayendo den mesun direccion cu e conflicto na GAZA.
E bishita di Netanjahu na congreso Mericano y si Trump ser condena na un castigo y sigui su lucha pa presidente di Merca ta indicacionnan cu e pais grandi aki ta perdiendo credibilidad ariba hopi tereno.
Gregorio Wolff
