Den cuadro di dia Internacional di Derecho di Mucha, e programa Nos Mainta na Telearuba conhuntamente cu 131 Aruba ta presenta hogar. 20 di november ta dia nacional y internacional di derecho di mucha. 20 di november ta e dia tambe cu 131 Aruba ta cumpli 26 aña di existencia. Durante 26 aña 131 Aruba a sa di duna sosten emocional, informacion y conseho na nos muchanan y hobenan di Aruba.
Banda di e sosten emocional, informacion y conseho pa medio di telefon, email y chat, 131 Aruba ta duna charla, workshop, proyecto y training na muchanan, hobenan y docentenan tocante temanan cu ta encera e desaroyo di mucha y hoben. Ta conoci cu 131 Aruba ta desaroya y implementa su mesun proyectonan y proyectonan pa organisacionan internacional manera Unicef NL, Ministerie van Volksgezondheid Welzijn en Sport di gobierno Hulandes y Pan American Development Foundation.
Den cuadro di e celebracion di 26 aña di 131 Aruba, ariba dia 17 di november ta dedica e programa Nos Mainta na Derecho di Mucha. Durante e programa diferente organisacion local lo ta invitado. Hunto lo elabora ariba con pa crea un hogar sigur y sano aki na Aruba.
E invitadonan cu lo ta den e programa ta: Fundacion pa Nos Muchanan, Jeugd Gezondheidszorg Aruba, Tienda di Educacion y Fundacion Contra Violencia Relacional. Nos Mainta y 131 Aruba kier a encurasha mayornan pa sintonisa Nos Mainta ariba 17 di November pa 9:00 di mainta.
131 Aruba kier a gradici Nos Mainta y nos partnernan local cu ta tuma nan impacto social na serio y ta inverti den e muchanan, hobenan y famia aki na Aruba. Un gradicimento ta bay na Setar N.V., Aruba Airport Authority N.V., WEB Aruba N.V., The Salamander Group, Aruba Hotel and Tourism Association, Telearuba, Marriott Resort Aruba, Vacation Aruba.com, New India Assurance, N.V. ELMAR, The Movies y MetaCorp N.V. cu ta haci hopi trabao di 131 Aruba posibel.
Pa mas informacion tocante e programa Nos Hogar, por tuma contacto cu 131 Aruba via nos website: 131.aw, facebook: https://www.facebook.com/aruba.131/, email: 131aruba@gmail.com of telefon 5886138/ 5884011.
