16 juli 2024
Awo mas cu nunca nos mester lucha pa nos norma y balornan tradicional. Nos mester combati e forsanan cu kier destrui matrimonio. E realidad ta cu Corte Supremo (Hoge Raad) a demostra su cara activista cu su decision di dia 12 di juli 2024 ultimo. Mescos cu Hof a demostra di ta activista cu su veredicto di dia 6 di december 2022. Un activista ta un persona cu ta milita pa un cambio den un area politico-social. Pero, esey no ta tarea di hues. E stoel di hues ta tras di mesa berde, su stoel no ta den parlamento. Tarea di hues no ta pa traha ley, sino pa aplica ley.
Hues ta haci su trabao ora e ta compara e echonan cu loke ley ta bisa. Tuma e caso di Benny. Hof a scucha Ministerio Publico su acusacion y a scucha Benny su defensa. Despues hues a bay studia tur e evidencianan y a compara e evidencia cu nos Codigo Penal. Asina hues a yega na su conclusion cu Benny a comete varios acto cu nos Codigo Penal ta prohibi, manera soborno, abuso di funcion y malversacion.
Den caso di matrimonio homosexual hues a bay mucho mas leu cu simplemente aplica ley. Hof a cuminsa bon, pasobra el a cuminsa na compara e definicion di matrimonio den nos Codigo Civil cu e prohibicion di discriminacion den nos Constitucion. Hof mester a sigui na enfoca riba e beneficionan legal cu parehanan di sexo opuesto tin, manera e echo cu ley ta regla nan herencia pa despues check si parehanan di mesun sexo ta haya e mesun beneficionan. Pero, no ta esey Hof a bay haci. Hof a cuminsa compara e balor sagrado, simbolico y emocional cu matrimonio tin cu e geregistreerd partnerschap. E balor simbolico ey no tin nada di haber cu ley, pasobra e balor simbolico ta producto di nos cultura y religion.
Ley no por crea ni e sentido ni e sentimento cu algo ta sagrado. Ningun hende ta sinti cu matrimonio ta sagrado pasobra matrimonio ta skirbi den ley. E sentimento profundo cu matrimonio ta algo importante ta resultado di nos cultura. E cultura ey ta surgi for di nos combersacionnan cu nos mayornan, maestronan y pastornan. E cultura ta surgi for di storianan cu nan a conta nos, manera esun di Adam cu Eva y e storia di e nacemento di niño Hesus. Di chikito nos a siña cu matrimonio ta un sacramento y nos a mira hende casa pa misa. Ta e custumbernan religioso den nos sociedad ta duna e balor sagrado na matrimonio. Hues no tin arte ni parte den crea of cambia cultura. Mucho menos e tin algo di haci si algo tin un balor simbolico of no.
Loke Hoge Raad a haci ta un inhusticia grandi, pasobra el a permiti Hof bulldozer un definicion nobo di matrimonio sin importa kico e pueblo di Aruba, Curaçao y Sint Maarten ta pensa y sinti. Nan a traha un ley cu parlamento di Aruba a caba di rechasa dos biaha consecutivo. Loke Hoge Raad a haci tambe ta un blasfemia, pasobra nan ta kere cu nan tin e sabiduria y e poder pa cambia e balor sagrado y simbolico di matrimonio pa haci’e mas “inclusivo”. E unico cos cu nan ta logra ta destrui un instituto cu a tuma hopi tempo ta forma den mente y curazon di un pueblo.
Ta importante pa subraya cu no ta tur Corte ta activista. Corda cu e hues den prome instancia a trata e caso di matrimonio cu respet pa nos cultura. Tambe e Corte Europeo pa derecho Humano ta respeta diversidad cultural di diferente pais. P’esey Corte Europeo sigur lo trata cualkier cuestion di discriminacion di hende homosexual. Pero na ningun momento Corte Europeo ta impone matrimonio homosexual riba ningun pais. Ta e parlamentonan di e paisnan so por contesta e pregunta si mester habri matrimonio pa parehanan di mesun sexo. E motibo ta obvio. Mester respeta e creensianan social y cultural cu ta profundamente hancra den e diferente pueblonan (EHRM 24 juni 2010, 30141/04, EHRC 2010/92, rov. 60-62).
P’esey nos mester anula e matrimonio homosexual di Hof y Hoge Raad. Nos mester lucha contra e movimento aki cu kier destrui nos autonomia cultural. Nos mester hancra un referendum den Constitucion. Nos mester hancra matrimonio entre un homber y un muhe den nos constitucion. Pa salvaguardia nos pais, nos mester combati politico manera Miguel, Marisol y Gerlien. Enfin, nos mester vota pa politico cu tin e curashi y cu ta dispuesto pa para firme contra tur tipo di corupcion di nos norma y balornan tradicional.
