Nos tur ta ripara con tempo a cambia, hende ta mas ocupa tras di nan mes cosnan , tras di placa, tras di trabao, tras di hende, tras di material, tras di nan telefon, pero e tempo pa Dios, cada dia ta birando cada dia hopi mas menos.
E tempo pa Dios ta un sacrificio na Dios cu mester bini na prome lugar den bida di tur hende.
Pesey mi ta roga boso, rumannan pa medio di e misericordia di Dios, pa presenta boso curpa como sacrificio bibo y santo,aceptabel pa Dios,cual ta boso sirbishi spiritual,di adoracion.
No sea conforme e mundo aki,ma sea transforma pa medio di e renobamento di boso mente, pa boso por,comproba kico ta e bon, y agradabel y perfecto boluntad di Dios.( Romanonan 12:2).
E bira na moda awor cu hende ta traha tur programma sin corda cu mester pone tempo pa Dios, y e mundo ta purba tur manera di blokia e sirbishi y tempo cu hende mester duna na Dios.
Ta masha poco trabao awendia ta tene cuenta cu hende mester sirbi Dios, tur ta wak pa nan mes prome.
Ora nos duna tempo na Dios, E ta duna nos pas, forsa, trankilidad, E ta restaura nos fisico y spiritualmente,E ta duna nos goso, E ta duna nos discernimiento.
E ta cambia nos pensamento, E ta pone nos reconoce pica, y arepenti y sigi padilanti.
E ley di Senjor ta perfecto, e ta restaura alma.
E testimonio di senjor ta fiel,e ta haci hende simpel bira sabi.
E preceptonan di Senjor ta corecto,nan ta alegra curason, e mandamento nan di Senjor ta puro, nan ta ilumina wowo.
E temor di Senjor ta limpi, e ta permanece pa semper, e huicionan di berdadero, nan tur ta completamente husto.( Salmo 19:7-9).
Laga e hobennan lesa esaki; Con un hoben por tene su caminda puro? Door di mantene esey segun bo palabra.Cu henter mi curason mi a busca Bo, no lagami desvia for di Bo mandamentonan. Bo palabra mi a sconde den mi curason pa mi no peca contra Bo.( Salmo 119:9-11).
Wak bon con e era digital den cual nos ta bibando a hala e hoben bay cune:
Hobennan a pone nan telefon prome cu Dios y prome cu nan famia,
Un hoben sin telefon ta manera un hoben sin cabes, cada cos cu nan tin cu haci nan tin cu consulta nan telefon, nan tin mas confiansa den nan telefon cu nan tin den Dios, pesey nos como mayor mester haci tur esfuerso, pa nos hobennan conoce Cristo Hesus.
Pasobra salbacion ta unicamente y solamente de Cristo Hesus, Hesus ta e caminda di berdad y e bida, ningun hende por yega serca e Tata sino ta pa medio di e Yiu.
Tur esnan cu tin tempo pa Senjor lo tuma refugio den Senjor y lo alegra nan mes den Senjor, pasobra Senjor conoce y ta proteha esnan cu ta di dje.
Hopi hende ta lubida locual Dios a bisa Josue, pa e esforsa su mes y sea balente, pa e medita den e buki di ley di dia y anochi, pa e haci conforme locual ta para scirbi den dje y asina su caminda lo prospera y lo e tin exito.
Den Cristo nos ta mas cu vencedor, pasobra nada ni ningun hende por separa nos for di e amor di Cristo Hesus.
No laga nos lubida, cu serca hende cos por ta imposibel, ma serca Dios tur cos ta posibel.
Tur cos mi por den Cristo , Kende ta dunami fortalesa,
Laga nos tuma tempo pa Dios, huntu cu henter nos famia.
Sinceramente, Pastor Marcel Balootje
