Sin confesion no tin pordon di pica, pasobra esun cu ta sconde su pica no ta prospera.ma esun cu ta confesa lo ricibi misericordia di Dios.
Pica no por wordo scondi pa Dios, pasobra Dios conoce cada intento di nos pensamento, pero locual nos mester haci ta demostra nos humildad y confesa cual ta e arma mas grandi cu nos tin, pa libra nos for di tur trampa di enemigo.
Una bes nos confesa nos pica nos ta libera for di gara di e enemigo,y nos consenshi ta limpi,y nos tin pas cu Dios y cu nos mes.
Den nos confesion tin nos bendicion ancra, tambe nos liberacion , pasobra mas nos tarda, e ta hiba nos na rabia y amargura. Pasobra ta para scirbi den 1 Juan 1:9 : Si nos confesa nos picanan, E ta fiel y husto pa pordona nos picanan y pa limpia nos di tur inhusticia.
Den esaki nos ta mira e poder di confesion con grandi e ta pasobra tambe e palabra di Dios ta sinja nos den Salmo 103:3 bisando : Kende ta pordona tur bo inkidatnan , Kende ta cura tur bo dolencianan.
Ningun tin rason pa biba den pica, pica no mester tin gara den nos bida , ni tampoco dominio riba nos bida, pasobra Cristo Hesus a muri na crus pa pordon di nos picanan. Pesey nos tin di arepenti, confesa, y aparta for di pica y biba pa Senjor.
E enemigo ta un abusador, y probechador, kende ta manipula hende, y hiba nan mente na inmoralidad, y abominacion, pasa asina nan permanece den su gara, pero aunke con grave y con mahos e pica por ta, den nos confesion nos ta derota e enemigo y hanja nos libertad den Cristo Hesus.
Rey David a comete pica, pero e a confesa y Dios a pordone, Saulo di Tarso a comete pica y Dios pordone y a lante y hacie un sirbidor di Hesus Cristo, of manera e mes ta bisa un esclavo di Hesus Cristo. E tranformacion di Saulo di Tarso, pa Apostol Pablo, ta solamente Dios por a hacie den su bida.Ta un transformacion di malbado pa sirbido, cu a tuma lugar ora confesion a cuminsa.
Nos mester sinja nos yuinan for di chiki, pa confesa nan picanan, y mantene nan relacion cu Dios limpi y corecto den tur tempo.
Tardansa di pordon ta hiba nos na rabia y amargura pasobra ta para scirbi den Efesionan 4:31-32; Laga tur amargura , furia, rabia,griteria,y calumnia,wordo kita for di boso,hunto cu tur malisia,y sea carinjoso un cu otro,misericordioso,pordonando , mescos cu Dios den Cristo tambe a pordona boso.
Esun cu no ta pordona , no ta fuerte, pero e tin duresa di curason, y duresa di curason no ta hiba hende dilanti, no tin crecemento spiritual caminda tin duresa di curason, no tin pas, no tin goso, solamente e mesun cosnan ta wordo ripiti cada rato cual lo produci stress y depresion.
Den Mateo 6:14-15 nos por lesa y tambe sinja kico ta pasa ora nos no pordona. Den Mateo 18:35 senjor ta mustra claramente kico E lo haci cu esnan cu no ta pordona di curason.Ora nos no ta pordona stimacion ta bay for di nos bida y amargura ta drenta y amargura ta contamina hende, pasobra un mayor cu no kier pordona por contamina henter su cas,y pone muchanan lanta cu rabia.
Esun cu ta stima su ruman ta permanece den lus,y no tin motibo den dje pa trompica.( 1 Juan 2;10).
Cristo Hesus a saca nos for di scuridad, pa lus.
Sinceramente, Pastor Marcel Balootje
