Den tur cos nos mester ta gradicido na Dios, den tempo bon , y den tempo malo, pasobra Dios tin poder pa cambia e tempo, y for di cada situacion,nos ta sinja, y hanja experiencia di bida, pero Dios ta keda bon, pasobra solamente Dios por haci milager y restaura tur locual nos a perde.
No preocupa pa nada, ma den tur cos,pa medio di oracion cu suplica cu gradicimento, laga boso peticionnan ta conoci dilanti di Dios. Y e pas di Dios cu ta surpasa tur comprondemento,lo warda boso curason y boso mente den Cristo Hesus.( (Filipensenan 4:6-7).
Nos gradicimeno na Dios ta demostra cu nos tin confiansa den Dios.Especialmente ora nos ta duna danki prome cu ricibi algo di Dios.
Hopi biaha hende ta hiba un bida di pidi, y pidi, pero ta lubida di gradici ora nan hanja locual nan tin mester.
Tin hende conoce Dios solamente ora nan tin mester, pero despues nan ta aleha, nan ta disparce, nan a lubida e situacion den cual nan tabata, y no ta duna gradicimento.
Gradicemento ta habri porta di bendicion, e ta aporta na e grandesa di Dios, e ta muestra cu nos ta reconoce cu Dios ta Soberano, cu nos por depende riba su palabra, pasobra ora Dios papia cos nan ta sosode.
No tin nada cu por kibra nos comunicacion cu Dios, pero tur cos ta depende si nos mes kier comunica cu Dios, pasobra nos por comunica cu nos boca, mente, y nos curason, e ta asina bunita cu nos por ta den hopi hende, pero nos ta haci oracion sin ningun hende sa, pidiendo Dios pa e cambia e situacion.
Ora Hesus tabata bay multiplica e cinco pan y dos pisca, E manda e disipelnan pa pone tur hende sinta, E a mira na cielo , E a bendiciona ,y despues kibra e pannan y duna e disipelnan pa nan pone dilanti di e multitud y asina cinco mil hende por a come y keda barica yen. ( Marco 6:33-44).
Na momento di lanta Lazaro for di morto a sosode lo siguiente; Anto nan a kita e piedra,Y Hesus a hisa cara wak ariba y bisa: Tata Mi ta gradici Bo, cu Bo a tende Mi . Y mi tabata sa cu bo ta tende Mi semper , ma pa motibo di e pueblo cu ta para rond di Mi,Mi a bisa esaki, pa nan kere cu ta Abo a mandami.
Wak e milager grandi cu a sosode ora Hesus ta hisa su cara na laira y gradici, tanto e milager di e pannan , como e momento cu Hesus a lanta Lazaro for di morto.
No laga nos lubida e historia caminda Hesus a sana 10 leproso y un so a bini bek pa gradici Hesus.
Gradicemento ta demostra fieldad y confiansa, ta un muestra cu nos ta kere den e poder di Dios, ora nos ta gradici , nos ta halsa Dios su nomber, nos ta duna tur e Gloria na Dios pa locual cu e so por haci.
Ta solamente Hesus por a multiplica 5 pan y 2 pisca, ta solamente Hesus por a lanta Lazaro for di morto despues di cuater dia for di morto.Solamente Hesus a bay na e crus pa pordon di nos picanan,awel nos tin suficiente motibo pa reconoce su grandesa y gradici Senjor.
Regosiha semper, Haci oracion sin stop. Sea agradecido den tur cos, pasobra esaki ta e boluntad di Dios,pa boso den Cristo Hesus.
Ta un gran bendicion ora nos ta haci oracion cu gradicimento, cu confiansa den Dios.
Sinceramente, Pastor Marcel Balootje
