Cada biaha cu nos spierta mainta, nos tin di gradici nos Tata cu ta den cielo pa un dia nobo cu E a duna nos.
No pensa cu ta bo wekker a lanta bo, ni tampoco e alarma riba bo telefon, pero sabi cu ta Dios ta den e asunto.
Hopi ta drumi pero no ta lanta, pesey cada dia cu nos lanta ta un momento pa gradici Dios, y pa duna Dios gloria, reconoce cu e ta Dios , y cu nos no por haci nada riba nos mes.
Wak rond di nos cuanto falta di respet tin pa Dios, pasobra no ta tur hende ta biba un bida den ignorancia, ta miyones y miyones di hende a tende di Dios, pero keto bay no kier entrega nan curason na Dios.
Dios ta bon, E ta misericordioso, E no kier pa ningun hende bay perdi , pero pa tur yega na conocemento di e berdad.
Cual ta e berdad? E berdad ta cu E a manda su Yiu unigenito pa ken cu kere den dj’E tin bida eterna, e no a manda e Yiu pa condena pero pa salba, esun cu kere ta salba , pero esun cu no kere ta condena, pasobra e no a kere den E Yiu unigenito di Dios.
No tin Tata terenal cu por compara cu nos Dios, kende ta grandi y poderoso, semper atento, tur ora na tempo, pa duna ayudo na su yiunan, nos Dios no ta drumi tampoco ta cabisha, Su yudansa y su presencia tey tur momento.
No tin nada cu ta imposibel pa nos Dios, di berdad esnan cu ta haci cherche mester arepenti, converti, y entrega nan bida completamente na Dios, pasobra no tin otro opcion, no tin otro Salbador, ta nos tur mester di Cristo Hesus.No tin otro caminda.
Ora nos mira cuanto maldad, cuanto matamento, cuanto hende ta inverti den arma, djis pa mata nan prohimo, nos ta pidi Dios tene misericordia.
Ora nos mira con hende ta trata otro malo,
persigi otro,
kibra otro,
nenga otro cuminda,
kita libertad di otro,
stroba crecemento di otro,
un pais ta perhudica otro grandemente, y nan ta yame politica, y nos tin cu pensa un rato:
Con Dios lo ta mira e asunto aki?
Awendia no ta facil pa lanta un famia sin Cristo Hesus, pasobra nos mester di Su yudansa pasobra e careda di maldad y diablura a anvansa cu solamente e por wordo detene cu poder y presencia di Dios.
A bira notable cu bo ta ripara un famia cu ta depende riba riba Dios den tur pas y trankilidad, cu un famia, cu no kier somete na e palabra di Dios, pero cu ta laga emocion di mundo domina nan hogar.
Nos ta bibando den un tempo trabahoso, caminda hende ta expresa tur locual ta contra e palabra di Dios, hende ta cambia nan actitud, hende ta bira rebelde y sin cuenta, hende a bira mas vengativo y no ta worry ken nan perhudica, hende ta insisti pa paga malo cu malo, hende ta haci manera nan ta cu Dios, pero nan curason ta lew for di Dios.
Ora nos haci e oracion di nos Tata cu ta den cielo, nos tin cu compronde bon na ken nos ta haci oracion, pa asina nos por respeta Dios, pasobra Dios ta donjo di tur cos, y Su boluntad semper mester bay dilanti di nos boluntad.
Si nos confesa nos pica, E ta fiel y husto pa pordona nos, nos picanan y libra nos di tur inhusticia.( 1 Juan 1:9).
Sinceramente,Pastor Marcel Balootje
