Atrobe Mi ta bisa boso,cu si riba tera,dos di boso bay di acuerdo tocante cualkier cos cu nan pidi, esaki ta wordo haci pa nan, door di Mi Tata cu ta den shelu. Pasobra caminda dos of tras reuni den Mi nomber ey Mi ta meymey di nan. ( Mateo 18:19-20).
Si nos kier mira algo sosode den nos bida, nos tin cu obedece palabra di Dios, hopi biaha hende kier ricibi pero nan no kier sigi e instruccion cu Dios ta duna, nan kier tur cos sin ningun esfuerso, pero Dios mes a duna e formula pa exito den nos bida, exito den nos cas, exito den nos Famia.
No ta pornada ta para scirbi : Si Mi pueblo cu ta wordo yama na Mi nomber: Humiya nan mes, y haci Oracion,y busca Mi cara,y bira for di nan mal camindanan, e ora ey lo Mi tende for di cielo, y pordona nan pica, y cura nan tera.
E enemigo ta haci tur cos , pa stroba oracion, pasobra e sa cu den esey tin forsa y den esey tin victoria, pasobra caminda dos of tres reuni den nomber di Senjor tin victoria, kico lo pasa ora miles, y miles reuni den Su nomber, tambe E lo ta meymey di nan y cosnan grandi y milagernan lo sosode.
Pesey cada hogar riba nos isla mester ta un hogar di oracion, y no un hogar di pleito, rabia y discusion, pasobra den e cosnan ey no tin ningun clase di bendicion.
E oracion den famia ta sumamente necesario, si e famia kier bay dilanti, si e famia kier tin exito si e famia kier wordo libra di trampa di e enemigo. Pasobra e poder di oracion ta kibra bruheria y vicio, ta corre cu inmoralidad, perversidad, mal comportacion, inhusticia, y mas cu tur cos ta aumenta e presencia di Dios den nos Hogar.
Cristo Hesus kier pa nos reuni den Su nomber, pasobra Su nomber ta riba tur otro nomber, E a bisa cu tur locual nos bay di acuerdo cune den su nomber, su Tata cu ta den cielo lo hacie pa nos.
Tur cos cu ta den Su nomber ta den Su boluntad, nos no por haya nada for di Su boluntad, pasobra e oracion di nos Tata ta sinja nos pa Su reino bini y Su boluntad sosode tanto na tera como den cielo.
Ta solamente beneficio tin pa nos, ora nos obedece y haci oracion, y hopi biaha nos ta pasa den necesidad, pasobra nos no ta lesa e palabra di Dios, y obedece Dios, pa asina cambio grandi tuma lugar den nos bida, cambio grandi tuma lugar den nos curason, nos wowo lo habri y stop di pone atencion riba cos cu no ta cumbini, y busca cara di Dios, pa asina nos por ricibi locual nos tin mester.
Tin scritura cu ta papia di unidad den famia, cual ta hiba na unidad den oracion.
Salmo 133:1 ta bisa: Mira ki bon y ki bunita ta ora rumannan biba hunto den harmonia.
Colosensenan 3;13; Y boso soporta boso,y pordona otro, si un di boso, tin un keho contra otro, mescos cu Senjor a pordona boso, asina boso tambe mester haci. Ademas di tur e cosnan aki bisti amor, cual ta e laso perfecto di unidad.
1 Pedro 3:8 : Finalmente , boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito .
Ta boluntad di Dios pa nos uni den oracion, pa asina nos mira su Gloria y bondad.
Sinceramente, Pastor Marcel Balootje
