Ta notabel cuanto amigo y conoci ta bay cas cu Senjor of manera ta wordo bisa den boca di pueblo hende ta muri.
Bo ta mira un hende mainta, y atardi e no tey mas.
Bo ta papia cu un hende na telefon, y despues di un rato , bo ta hanja e noticia cu e persona a fayese.
Bo ta manda un whatsup pa un persona, pa bo sa conta cu su salud, e ta contesta bo luchando mi hno, caba despues di 2 dia bo ta tende e noticia cu e mesun persona ey a bay cas cu Senjor.
Y ainda falta esnan cu ta yamabo ayo ayera y awe no tey mas.
Palabra di Dios ta sinja nos lo siguiente: Confia den Senjor cu henter bo curason y no depende riba bo mes comprondemento. Den tur bo caminda nan reconoc’E y elo dirigi bo berehenan,( Proverbionan 3-5-6).
Si un hende no ta depende di Dios pa su bida, of no kier depende riba Dios pa su bida, ta riba ken e ta depende pa su bida anto? Riba placa, posicion, poder, pasobra ningun di e cosnan ey no por yuda bo ora cu morto bishita.
Awendia tin hende ta bisa cu nan ta depende di universo, cual ta un excuus barata pa no reconoce Dios, pasobra ta Dios mes a traha universo, y tur locual tin den dje,asina ta cu con cu hende haci pa nan biba, ta resulta cu nos tur su bida ta depende di Dios.
Mi alma ta spera den kietud riba Dios so,pasobra mi speransa ta den dj’E.
E so ta mi baranca y mi salbacion, mi defensa lo mi no wordo movi.
Riba Dios mi salbacion y mi gloria ta sosega.
E baranca di mi fortalesa, mi refugio ta den Dios. ( Salmo 62:5-7).
Cu Bo conseho lo Bo guiami, y despues ricibi mi den gloria.
Ta ken mi tin den cielo fuera di Bo?
Y fuera di bo mi no ta desea nada riba tera.
Mi carni y mi curason por faya, ma Dios ta e fortalesa di mi curason.
Y mi porcion pa semper.(Salmo 73:24-26).
Lo bo warda den pas perfecto, esun cu su pensamento ta permanece den Bo. Pasobra e ta confia den Bo.Confia den Senjor pa semper, pasobra den Dios e Senjor nos tin un Baranka eterno.( Isaias 26:3-4).
Ken entre boso ta teme Senjor,ken ta obedece e bos di Su Sirbido.Ken ta cana den scuridad y no tin lus? Lage confia den e nomber di Senjor y depende riba su Dios.(Isaias 50:10).
Bo reino ta un reino eterno y Bo dominio ta di generacion pa generacion ( Salmo 145:13).
Encomenda bo obranan na Senjor, y bo plannan lo wordo stableci. ( Proverbionan 16:3).
Tur cos riba e mundo aki lo tambalia y tur cos lo wordo sacudi, pero nos Dios Todopoderoso ta firme y eterno riba su trono, pasobra e ta Dios.
Nos ta bibando den tempo trabahoso, tempo dificil, tempo caminda respet ta bayendo for di moda, inmoralidad a aumenta, y malicia kier domina tur caminda.
Pero ta keda na cada un di nos pa mantene nos bista riba Dios , e donjo di nos bida, e unico speransa cu nos tin, cu nunca lo bandona nos , ni tampoco laga nos desampara.
No tin nada cu por reemplasa Cristo Hesus den nos bida, pasobra E ta e unico mediador entre Dios y hende.
No a keda ningun otro opcion sino di entrega completamente na Dios, pasobra salbacion y bida eterna ta den Su man.
Sinceramente, Pastor Marcel Balootje
