Dia pa dia nos ta mirando con maldad ta aumenta, peliger tur caminda, inmoralidad kier tuma dominio riba mundo, tur tipo di idolatria ta aparece, un calor intenso cu ya mundo no por controla.
Den esaki nos ta mira e misericordia di Dios,pasobra aunke e mundo ta rebelde, Dios a manda Su unico Yiu pa ken cu kere den dj’E no bay perdi ma tin bida eterna.
Dios ta nos baranca fuerte, nos forti, y escudo e ta proteha nos di tur maldad.
Aunke nos ta mira con paisnan grandi ta sera nan frontera pa e palabra di Dios, nos tin cu corda riba e gran mandato di Dios, pa bay den tur nacion y hiba e palabra, nos tin di haci tur locual ta posibel pa e palabra di Dios yega serca, tur hende, esun cu kere lo ta salba, pero esun cu no kere ta condena caba.
Pablo a scirbi na Timoteo den 2 Timoteo 3:1-5 cu lo bini tempo trabahoso, y esaki ta locual nos ta mirando actualmente, caminda hende ta bira rebelde, bon ta wordo tuma como malo, y malo ta wordo tuma como bon, hende ta wak solamente nan interes y ta lubida riba interes di otro.
Tur locual Cristo Hesus a spierta di dje den Mateo 24 ta tumando lugar y ainda falta, cada un cu tin wowo mester por mira, y cada un cu tin orea mester por tende, pasobra Dios ta sacando Su claridad riba tur hende y riba tur cos, pasobra su binida ta serca.
Nos mester di Dios su proteccion, y Dios ta sigura nos esey den Romanonan 10:9-10.bisando: Cu si bo confesa cu bo boca Hesus como Senjor y kere den bo curason,cu Dios a lante for di morto, lo bo ta salba, pasobra cu curason hende ta kere pa hanja husticia, y cu boca e ta confesa pa hanja salbacion.
E amor di Dios tey pa tur hende, Dios a stima tur hende, su amor tey pa tur hende, awendia tin hopi competencia den cual hende ta busca pa halsa nan mes pero hopi ta lubida, cu siervo di Dios nos ta, yama pa sirbi.
Dios ta nos protector, ta Dios ta cuida nos, E ta nos refugio, nos pronto auxilio, Su palabra ta bisa den Salmo 91:4: E lo cubribo cu Su plumanan, y bao di Su halanan lo bo busca refugio. Su fieldad ta nos escudo y un baluarte .
Palabra di Dios ta bisa nos den Isaias 54:17: Ningun arma cu wordo forma contra bo lo prospera, y tur lenga cu lanta contra bo den husgamento lo bo condena. Esaki ta e herencia di e sirbidonan di Senjor, y nan hustificacion ta bini for di Mi, Senjor ta declara.
Salmo 37:39 ta bolbe recorda nos bisando: Ma salbacion di e hustonan ta bini for di Senjor, e ta nan fortalesa den tempo di angustia.
Nos ta bibando den un tempo cu hende ta traha yen di plan y pone yen di fecha cu anja den cual nan kier haci cierto cosnan, y hopi esnan cu ta kere den cosnan aki, pero nos no por lubida cu Senjor a bisa cu su tempo no ta nos tempo y su dia no ta nos dia.
Pesey nos fieldad na Dios mester aumenta dia pa dia, pasobra e dia di Su binida ningun hende lo no sa.
Senjor ta mi baranca y mi forti,y mi libertador,mi Dios,mi baranca,den kende mi ta tuma refugio, mi escudo, y e cacho di mi salbacion, mi toren halto.
Ta tempo pa nos tur hala mas serca Senjor.
Sinceramente, Pastor Marcel Balootje
