Asina anto , cada un di nos lo duna cuenta di su mes na Dios. ( Romanonan 14:12).
Pasobra nos tur mester parece dilanti e tribunal di Cristo, pa cada un wordo recompensa pa su hechonan den e curpa, segun loke e a haci, sea bon of malo.( 2 Corintionan 5;10).
Ningun hende no por representa otro dilanti di Dios, pasobra salbacion ta personal, ta esun cu kere lo ta salba, ma esun cu no kere ta condena caba, pasobra e no a kere den e Yiu unigenito di Dios.
Awor no ta existi asunto di kere parcialmente, pasobra Dios conoce curason di tur hende, y ningun hende no por ganja Dios, ni tampoco haci bofon di Dios.
Pesey e palabra di Dios ta bisa, cu hopi cu lo bisa Senjor, Senjor, y Senjor lo bisa bay for di mi haci dor di maldad nunca mi a conoce bo.
Tampoco no tin asunto di conoce Senjor y sigi biba manera nos kier, cargando e nomber di Senjor pero no agrada Senjor cu nos bida, den un palabra bisa bibando con cu ta, pasobra Senjor kier pa nos ta prepara pa su binida.Wak kico a sosode cu e cinco birgen cu no a percura pa nan tin azeta den nan lampi, y laga nos perservera, biba corecto y prepara y no trata Dios con cu ta.
E palabra di Dios ta bisa: Esun cu persevera te na fin esey lo ta salba .( Mateo 24:13).
Despues cu un hende muri , no tin nada mas cu por wordo ahusta den su bida , dilanti di Dios, ni maske cuanto oracion, wordo haci, ni maske cuanto nos papia, grita of lamenta, toch nada por wordo haci , pasobra cada ken tin cu duna su cuenta dilanti di Dios.
Hopi hoben ta pensa awel mi mayornan ta Cristian , awel ami ta cla pasobra mi mayornan ta haci oracion pa mi, esey ta berdad hoben, bo mayornan ta stima bo, pero abo mester kere y tin un relacion intimo cu Cristo Hesus, pasobra cada ken mester duna cuenta na Dios pa nan mes.
Pesey como mayor nos mester, lanta nos yuinan den e Palabra di Dios, pa nos yuinan conoce e seriedad di salbacion, y e displina di Dios, y na grandi nan mes mester percura pa keda riba e caminda di Dios.
Si nos muri den Cristo Hesus nos lo lanta den Cristo Hesus, pasobra tur hende mester pasa dilanti e tribunal di Cristo, sea pa bida eterna den Cristo celebrando Victoria hunto cu Cristo y e angelnan, of yorando den decepcion y derota huntu cu diabel y su compinche nan.
Tene cuenta cu segun Lucas 16:19-31 ningun hende cu drenta cielo, no tin contacto cu esnan den fierno, ni esnan den fierno no tin contacto cu esnan den cielo, ni tampoco ningun di nan por tin contacto cu esnan cu ta riba tera, no tin cuenta di hiba respondi, tur locual hende mester haci ta scucha, y kere den Cristo ora nan ta na bida.
Y ora nan muri nan famianan por tin sigur cu na a sosega na pas, tin hende ta hanja un chens cu den ultimo momento nan lo entrega nan bida na Cristo Hesus, esey ta sosode segun Dios permiti, pero no ta tur ta hanja e oportunidad ey, pesey no laga Cristo un banda ora bo ta na bida.
Pasobra segun bo biba, bo ta wordo hustifica , of bo ta wordo condena.
Hende ta destina pa muri un biaha so y despues di esaki ta bini huicio.
Sinceramente , Pastor Marcel Balootje
