Si un hende ta busca un cambio berdadero den su bida, no tin mihor caminda pa buske , si no ta riba e caminda di Dios, E caminda di Dios ta e caminda di berdad y bida, ta un caminda solido, caminda bo ta riba e Baranca Fuerte , E fuente di tur bendicion, Esun cu tin control di tur cos , esun cu ta doño di tur cos.
Ora un hende kier mira un cambio den su bida, e mester coopera pa e cambio, pasobra tur esnan cu a crece den Señor a permiti Señor guia nan bida, pasobra ningun mata no por crece si e no ta pega na e ranca.
Un hende ta permanece den mesun situacion, te ora e realisa cu ta Dios e mester den su bida, y e reconoce cu ta solamente Cristo Hesus por libre di e trampanan di diabel.
Pasobra mientras cu un hende keda den su capricho y su duresa di curason, e ta lanta furia di Dios pa su mes, y su situacion lo no cambia, sino lo bira peor.
Pesey e Palabra di Dios ta splica nos bon cla den Juan 3:16-19 bisando: Esun cu kere lo ta salba y e esun cu no kere ta condena pasobra e no a kere den e Yiu unigenito di Dios.
Dios no a manda su Yiu pa condenacion sino pa salbacion, pero ora un hende no ta respeta, no tin temor di Dios, ta haci cherche y bofon di Dios, ta e mes ta buscando condenacion pa su bida.
E peliger ta di tende e berdad, y rechasa e berdad, pasobra ora bo rechasa e berdad, no ta hende bo ta rechasa, pero ta Dios, bo ta rechasa, y tur esnan cu rechasa Dios, Dios mes lo entrega nan na un mente perverso, pa haci cosnan cu no ta cumbini.( Romanonan 1:28-32).
Dios ta stima tur hende y e no kier pa ningun bay perdi ma pa tur yega na conocemento di e berdad.
Pesey e palabra di tur ta bisa nos tur momento: Somete boso mes na Dios , resisti e diabel y e lo huy for di boso.pasobra e unico forma pa nos scapa for di e gara di e maligno, ta ora nos bida ta den mas di Dios.
Y pa nos bida ta den man di Dios, nos mester entrega nos bida na Dios. Y no na un religion, pasobra religion no ta salba ,salbacion ta bini solamente y unicamente for di Cristo Hesus, Cristo Hesus a entrega su bida pa pordon di nos picanan e ta nos unico Salbador.
E spirito di mentira cu ta domina e mundo, y pone hopi hende kere cu nan no tin mester di Dios, lo hiba hopi hende na un gran decepcion, pasobra sin Cristo Hesus lo no tin entrada pa cielo.
E berdad mester wordo predica, sin nada di sconde, pasobra tur hende mester sa e berdad y e condicion poni pa Dios, pa nos bida por ta agrada Dios, y asina nos cana den boluntad di Dios.
Ora nos ta papia di politica nos ta papia di coalicion, pero den nos bida spiritual no por tin coalicion, pasobra nos no por sirbi dos Dios, pasobra ta un Dios tin y un mediador entre Dios y hende Hesus Cristo.
No laga ningun hende gañabo cu bo por sirbi Dios manera bo ke, pero zorg pa bo tin Cristo Hesus como doño y Señor di bo bida. Pasobra tur rudia mester dobla y tur lenga mester confesa cu Cristo Hesus ta Señor.
Sinceramente, Pastor Marcel Balootje
