Lo Bo warda den pas perfecto, esun cu su pensamento ta permanece den Bo , pasobra e ta confia den bo. Confia den Senjor pa semper, pasobra den Dios e Senjor nos tin un baranca eterno.( Isaias 26:3-4).
A keda demostra cu ta dificil pone nos confiansa den sistema di mundo, ta masha dificil pa mantene amistad cu mundo y asina cay den enemistad, cu Dios. Tur locual mundo por ofrece ta temporal, pero cosnan di Dios ta eterno.
Placa no ta salba ningun hende, propiedad tampoco, nos tur su salbacion ta hancra unicamente den Cristo Hesus, e unico mediador entre Dios y hende.
Den Juan capitulo 15 :1-8 Cristo Hesus ta splika bon cla con e relacion entre nos y Cristo mester ta.
Y den versiculo 7 e ta corda nos bisando: Si boso keda den Mi y Mi palabra keda den boso, pidi tur loke boso kier, y esaki lo wordo haci pa boso.
Cristo Hesus a bisa tambe , Esun cu no ta cu Mi ta contra Mi , y esun cu no ta recohe hunto cu Mi ta plama.(Mateo 12:30).
Esaki ta pa spierta nos cu nos mester ta uni cu Cristo Hesus, pasobra si no ta asina nos lo ta manera un taki kibra for di un mata cu ta bay secando, pasobra e no ta ricibi forsa for di e mata.
E enemigo ta wak esnan cu ta pensa cu nan por biba sin Dios, y eynan e ta deposita su maldad, eynan e ta deposita mal pensamento, odio, falsedad, falta di pordon y inmoralidad.
Y mas trabahoso e tempo bira mas nos ta nota falta di presencia di Dios den bida, di hende door di actitud arogante y falta di temor di Dios, y esey ta pone cada ken samina nan mes bida y wak si nan ta para den Fe den Cristo Hesus.Pasobra manera e cos ta bayendo den un momento of otro nos por hanja nos para dilanti di Dios pa duna cuenta.
Ma na tur esnan cu a ricibi E, na nan e a duna derecho pa bira yuinan di Dios, esun cu ta kere den Su nomber, cu no a nace di sanger, ni di e boluntad di hende, ma di Dios.( Juan 1:12-13)
Lo no tin ningun speransa pa esnan cu no ta kere den e Yiu Unigenito di Dios, pesey locual tin para den Juan 3:16-18 ta importante pa bida di tur hende, pasobra esun cu kere lo ta salba y esun cu no kere lo ta condena, esaki no ta religion, pasobra den Juan 3:16 religion no ta wordo representa, pero un relacion cu Cristo Hesus ta wordo ofrece na tur hende, pasobra Dios a stima mundo.
Y den Juan 14:1-3 Cristo Hesus ta duna promesa na tur esnan cu ta kere den dj’E bisando: No laga boso curason bira intrankil,kere den Dios,kere tambe den Mi.
Den cas di Mi Tata tin hopi lugar di biba,si no tabata asina, lo Mi a bisa boso, pasobra Mi ta bay pa prepara un lugar pa boso.
Y ora Mi bay y prepara un lugar pa boso, lo Mi bin atrobe y ricibi boso serca Mi, pa caminda Ami ta, boso tambe por ta.
Hesus a bisa den Mateo capitulo 13 cu e yerba shimaron lo wordo recohe mara hunto y pega na candela y e maishi lo wordo recohe y warda den mangasina. Esey ta nifica cu E ta bini bek bin busca esnan cu ta di dj’E, pasobra Dios nunca lo permiti e husto wordo destrui huntu cu e malbado.
Sinceramente Pastor Marcel Balootje
