Pesey, sea imitador di Dios,manera yuinan stima, y cana den amor, mescos cu Cristo tambe a stima boso,y a entrega Su mes pa nos, un ofrenda,y un sacrificio na Dios como un holor dushi.( Efesionan 5:1-2).
Pesey ami, prisonero di Senjor,ta roga boso,pa cana di un manera digno di e yamada,cu cual boso a wordo yama. Cu tur humildad Y suavidad,Cu pasenshi, soportando un y otro den amor. Siendo diligente, pa preserva e unidad di Spirito den e vinculo di pas.( Efesionan 4 :1-2-3).
Laga tin den boso e actitud aki , cu tabatin tambe den Cristo Hesus. Kende aunke E tabata existi den forma di Dios, no a considera igualdad cu Dios, pa tene na dje. Ma a bandona Su mes gloria y a tuma , forma di un sirbido siendo traha den e semehansa di hende.( Filipensenan 2:5-6-7).
Hopi biaha nos ta tende tocante di un role model , un hende cual nos por imita, y haci manera e ta haci , pa cosnan bay bon cu nos, pasobra e a haci tal manera y cosnan a bay bon cune.
Hopi biaha nos ta imita un persona su forma di bisti, su actitud, su manera di papia, hasta mayornan ta bisa nan yiu pa nan wak riba tal hende y haci manera e a haci.
Nos kier imita artista di cine, tin kier imita politico, tin kier hiba un bida manera un otro a biba, sin tene cuenta kico por tin scondi den su bida.
Ta hopi forma di imitacion y copia tin awendia, pero ningun di nan tin e humildad den nan bida manera Cristo Hesus.
Imitacion di Cristo Hesus ta nifica hiba un bida di obedencia,
Evita di tur manera pa drenta den caminda scur,
Evita di papia palabra malo,
Evita di envidia,
Evita di pleita,
Evita di busca algo cu ta hiba na discucion y pleito, sea humilde, tene amistad cu tur hende, no rechasa ningun hende, pero alcontrario sea un bendicion pa nan tur.
E momento cu diabel a tende cu Cristo Hesus a resucita, e a hanja dolor di cabes te awe, pasobra e a pensa cu ora bo dal e cabes , henter e curpa ta cay y no ta lanta mas. Pero Su Tata cu ta den cielo a lant’E cu mas poder y autoridad, y pa demostra Su grandesa E Tata a pone sinta na Su man drechi.
Y awor tur rudia mester dobla y tur lenga confesa cu Cristo Hesus ta Senjor pa gloria di Dios Tata.
Ma esun cu warda Su palabra, den dje e amor di Dios a wordo perfeciona, berdaderamente. Pa medio di esaki nos sa cu nos ta den dj’E. Esun cu bisa cu e ta permanece den dj’E mester cana manera cu E a cana.( 1 Juan 2 :5-6).
Laga nos habri nos wowo y nos bida y no bisa cada rato Senjor , Senjor y no ta haci locual Senjor ta bisa, pasobra nos mester bira hacidor di e palabra y no solamente scuchador, so, ta den hacimento tin crecemento, pasobra Senjor ta aproba obedencia.
Den e actitud di Cristo, nos mester enfatisa, cu nos mester stima nos prohimo manera nos mes, no ganja otro. no usa otro su pasado pa keto bay purba di mustra cu nos ta bon y e otro si ta malo, pone malisia un banda, corre leu for di amargura, stop di venga otro, sinja pordona mas lihe cu ta posibel, y biba na pas cu otro.
Imitacion di Cristo Hesus mester ta visibel den nos bida.
Sinceramente, Pastor Marcel Balootje
