Samson no a perde su forsa ,pasobra su cabes a wordo feita, e a perde su forsa pa motibo di su desobediencia na Dios.
Desobediencia den tur sentido di palabra ta kibra nos forsa, spiritual, moral y fisico.
Desobediencia na Dios ta pone cu ora maldad presenta nos no tin forsa pa reprende, y rechase.
Desobediencia ta habri porta pa malesa.
Desobediencia ta habri porta pa discucion, pleito y division.
Desobediencia den trafico ta habri porta pa accidente.
Desobediencia den matrimonio ta habri porta pa inmoralidad y adulterio.
Desobediencia den nos finansas ta habri porta pa preocupacion y dolor di cabes.
Desobediencia den mantencion di nos auto , por pone nos cana na pia.
Desobediencia den trabao, por pone cu nos ta perde nos trabao..
Desobediencia na Dios, ta duna diabel ventaha den tur area di nos bida.
Desobediencia di un alumno , ta pone cu e no ta gradua.
Den tur cos cu nos ta haci , nos obediencia na Dios mester wordo mira, pasobra esey ta nos bida.
Mas obediencia na Dios tin den nos bida, mas bendiciona nos ta.
No laga ningun hende gañabo cu bo ta asina profesional, bo ta asina bon, cu bo no tin mester di Dios. Pasobra hende ta gusta depende riba hende, confia den hende, y despues ora hende defrauda nan, nan ta bisa hende ta falso, pero esey no ta e berdad, e berdad ta e, desobediencia na Dios, caminda hende a pone carni ( Hende) como su fortalesa. ( Jeremias 17:5), y a lubida of rechasa Dios.
Pakico boso ta yama Mi , Señor , Señor y no ta haci loke mi ta bisa. ( Lucas 6:46).
Cuanto tempo mas O simpelnan boso lo stima simplesa, y bofonadornan lo tin delisia den hacimento di bofon.
Bolbe na mi reprendemento! Mira lo Mi derama mi Spirito riba boso,lo mi haci mi palabranan conoci na boso.
Pasobra Mi a yama y boso a nenga,mi a saca mi man y ningun hende a haci caso.Ma boso a rechasa tur mi conseho, y no tabata kier mi reprendemento. Tambe lo mi hari di boso calamidad. Lo mi haci bofon ora miedo bin riba boso,ora boso miedo bin manera tempestad, y boso calamidad bini manera un warwaru.Ora cu ansha y angustia bin riba boso.
E ora ey nan lo yamami, ma lo mi no contesta, nan lo buscami cu diligencia, ma nan lo no hañami, pasobra nan tabata odia conocemento, y no a scohe pa e temor di Señor. ( Proverbionan 1:22-29)
Den Proverbionan 1 : 33 ta para scirbi lo siguiente: Ma esun cu scuchami lo biba confiadamente,y lo biba trankil sin miedo di maldad.
No laga ni un hende gaña boso cu palabranan bano, pasobra ta pa motibo di e cosnan aki e furia di Dios ta bin riba e yuinan di desobediencia. Pesey no sea participe hunto cu nan.
Si un hende bisa bo pa haci maldad, of participa den maldad, sea asina sabi di wak e den su wowo y puntre , dicon bo mes no ta bay hacie?
Maldad ta bini lora den aun papel di regalo, y hopi biaha cu palabra nan dushi huntu cune, ofreciendo seguridad falso,pa asina hende cay den gara di diabel, pero esnan cu tin temor di Dios, ta huy bay lew,y ta rechasa maldad.
Desobediencia ta pone e man di Dios bira contra nos ( 1 Samuel 12:15).
Obediencia , ta pone bendicion di Dios yobe riba nos bida na abundancia.
Nos tur por haci fout, pero humildad y obediencia ta lanta nos bek.
Sinceramente, Pastor Marcel Balootje
