Den un comunicado cu SOLO DI PUEBLO a ricibi, Cas di Cultura a confirma cu comedia ta sigui cu 150 persona den sala, 40 patras y 16 riba scenario. Tambe SOLO DI PUEBLO a haya un confirmacion for di e vocero-pr di Crisisteam, Sr. Croes, cu den sala por tin 150 persona.
Tabata ayera cu un otro medio di comunicacion a dicidi pa emiti un noticia, bisando cu “SOLO DI PUEBLO TA GAÑA”, unda nan kier a refuta e ponencia di SOLO DI PUEBLO. Nan a nenga rotundamente, pero na mes momento nan no kier a divulga cuanto persona lo por ta den sala. Esey a lanta mas sospecho y pregunta! Tambe nan mes a admiti di a manda pidi permiso pa por a hinca mas persona den sala, cual cantidad lo a surpasa 200 persona, si encaso cu nan a haya aprobacion.
SOLO DI PUEBLO ta condena y rechasa e intento envano di e medio di comunicacion cu kier a bagetalisa nos noticia, pinte como fake news, pa despues di algun hora nos bin haya sa cu den sala ta permiti 150 persona, plus personal di cas di cultura, plus personal technico, plus e grupo, plus promotornan local.
Tin un dicho ta bisa: Pa con lihe e mentira ta, e berdad ta alcanse.
Aki nos ta pone e comunicado intacto di Cas di Cultura, pa no laga espacio pa duda, unda SOLO DI PUEBLO a papia berdad!
###
Pa medio di esaki Cas di Cultura ta duna informacion di e protocol vigente for di juli 2020, ora ta trata evento na Cas di Cultura. Cliente y bishitantenan ya conoce esakinan, pero ta bon pa ripiti pa esnan cu no ta na altura. Hunto cu DVG y Crisisteam e reglanan aki a keda acorda:
Ora di drenta edificio, mondkap ta obligatorio constantemente, incluyendo den salanan.
Ta haci contact tracing na porta, sea organisador ta entrega lista caba of personal di Cas di Cutlura ta haci esaki ora publico drenta.
Ta midi temperatura y spray man cu sanitizer.
Por drenta sala grandi mesora pa sinta riba stul liber cu bo grupo/famia, cu no ta marka cu tape cora, den e rij liber cu ta habri. Esaki ta percura e distancia safe.
Maximo di 150 persona presente como publico durante show den auditorium cu mondkap. Backstage por tin maximo 40 persona, sinta riba asiento asigna cu mondkap. Sala Unoca, banda di cafe, por tin maximo 50 persona sinta, tambe cu distancia fisico entre stul.
Riba stage a acorda un maximo di 16 persona, cu distancia fisico di 1.5m y mondmask bisti. 1 cantante so mag di ta sin mondkap. Coro di back-up mester tin mondkap y distancia fisico. No tin bailamento door di publico.
No tin pauze, pues por cumpra cos di bebe prome cu show, solamente un persona di famia/grupo. No ta permiti algomeracion den foyer (lobby), ni prome ni despues di show. Ta sanitize despues di cada show.
###
No ta conoci cu contagio a sosode na Cas di Cultura, pues team y directiva di Stichting Schouwburg Aruba ta gradici pueblo, artistanan y organisadornan cu nan bon comportacion pa cu nos reglanan. Nos ta contento cu e mundo cultural/artistico na Aruba por a haya aliento pa medio di nos plataforma y nos reglanan y ta duna danki na DVG y Crisisteam pa a duna nos e confiansa aki. Mas artista y grupo ta bon bini pa sondea pa organisa nan evento den nos espacio safe. Na otro paisnan teatronan ta den situacion hopi grave, pues nos ta gradicido. Keda mira nos FB page y website pa actividadnan publico y percura pa cumpra bo carchi na tempo paso asiento ta limita ainda. Stay safe!
