Den nomber di Cristo Hesus di Nazareth awe, si awor aki mes, tur plan di scuridad, inmoralidad, bruheria y santeria cu por a lanta contra bo bida, of a lanta contra bo bida y famia ta keda
cancela, destrui, y tur spiritu impuru ta bay pa nunca mas bini bek. (Marco 9;25).
Ora nos ta kere den nos Senjor Cristo Hesus E a duna nos autoridad contra tur locual ta scuridad y malesa, pasobra E a bisa den Marco 16:17-20 cu e senjal nan aki lo sigi esnan cu ta kere,
Tur posibilidad ta existi cu cos no tabata bay bon den nos bida, y nos tabatin dificultad pa bay dilanti, pero cu yudansa di Dios, nos alcansa meta cu hopi biaha nos mes no por kere na unda nos ta awe.
Pero tambe nunca kere cu bo por avansa den bida cu yudansa di scuridad, inmoralidad, manipulacion, corupcion, pasobra e dia cu menos bo spera e enemigo lo laga bo cay, pasobra su poder ta temporal, e ta tata di mentira, y hopi cos cu ta mustra bunita, pero ora e berdad, sali na cla berguensa ta pa esun cu a kere den su maldad.
Nunca lubida con bo mayornan a lanta bo, con nan a cria bo, porta bo no a lanta hunto cu bo mayornan, pero nunca lubida e persona cu Dios a permiti guia bo riba e bon caminda , pa awe bo ta caminda bo, ta sea semper agradecido.
Trata tur hende bon, y no paga malo cu malo, pordona, pasobra pordon ta trece bendicion, y liberacion, sea esun cu ta pordona prome, pa asina demostra cu bo ta biba, e palabra di Dios.
Ora Dios lanta bo, y pone bo para riba bo pia,corda cu ta Dios a hacie pa bo y no bo mes, den tur cos sea agradecido na Dios, keda humilde, keda trankil, no laga orguyo di mundo, gara bo curason y cuminsa haci cos robes y lubida for di unda Dios a saca bo y libera bo.
Bonda ta bini di Dios y bondad ta bini di ariba, Dios ta pone hende hunto cu bo pa yuda bo, hende cu ta stima bo y kier bo bon.
Por ehempel bo ta un homber/muher, y Dios a duna bo un esposa/esposo cu ta stima bo, por ta e no ta bunita manera un Miss Universo of un tipo di artista, pero su curason ta bunita, e ta para banda di bo den bon y den malo, e ta respeta bo, den tur momento, e ta fiel y sincero, corecto, y semper bo por conta su carinjo y atencion.
Awor bo a conoce den un tempo cu cos no tabata bay bon cu bo den bida, pero hunto boso a lucha y yuinan a bini, cas a wordo traha, auto a wordo cumpra, abundancia cu Dios a provee a drenta cas, sea agradecido un na otro, pero na prome lugar sea agradecido na Dios y no laga material bruha boso cabes.
Trata tur hende bon, yuda tur cu bo por yuda, no menosprecia ningun hende, no discrimina ningun hende, corda for di unda Dios a saca bo y libera bo, y sea humilde den tur cos, sigi sirbi Dios, cu firmesa den boso curason, y boso lo wak con e bendicion di Dios, lo briya riba boso yuinan.
Pasobra wowo di Senjor ta riba e hustunan,y Su horea ta atento pa scucha nan oracion, ma e cara di Senjor ta contra esnan cu ta haci malo.( 1Pedro 3:9).
Sea agradecido na Dios tur momento.
Sinceramente Pastor Marcel Balootje
