For di e caminda di mas scur den bo bida, Dios a libra bo.
Ora bo tabata malo na cama pa muri Dios a lanta bo.
Ora bo no tabatin trabao Dios a sostene bo.
Ora bo matrimonio tabata na werki Dios a restaura tur cos.
Ora financieramente bo tabata kibra, ta Dios ta Esun cu a habri portanan pa bo.
Ora tur hende tabata papia y bisa cu e no ta lanta mas, Dios a lanta bo.
Ora tur hende bandona bo, Dios semper ta cu bo, e no ta laga bo desampara.
Ora droga y alcohol danja bo organo, Dios tin poder pa sana bo.
Ora bo mente ta cansa cu stress y depresion y bo salud mental a bay atras Dios tey pa bo.
Ora diabel mester ganja bo y bisa bo pa kita bo bida, Dios su brasa ta habri pa bo.
Ora mal noticia mester drenta Senjor ta bo consuelo.
Ora e enemigo mester lanta contra bo, Senjor ta bo refugio y bo fortaleza.
Ora hende papia riba bo y hasta saca mentira pa danja bo nomber, Dios ta defende bo.
Ta dificil lubida tur locual Dios ta haci pa nos, pasobra locual Dios por haci pa nos. Ta Dios so por hacie pa nos,tin cosnan secreto den nos bida, entre nos cu Dios, cu ningun hende no sa , pero nos no por lubida cu ta Dios a hacie pa nos.
Salmo 103:1-4 ta para scirbi: Bendiciona Senjor . O mi alma, y tur loke tin den Mi bendiciona Su nomber santo, Bendiciona Senjor O Mi alma, y no lubida ni un di su beneficionan.
Kende ta pordona tur bo inikidatnan, Kende ta cura tur bo malesanan. Kende ta redimi bo bida for di destruccion, kende ta corona bo cu misericordia y compasion.
Y si un hende por a lubida ta para scirbi den 1 Juan 1:9 pa nos tur igual, pa ningun hende no sinti nan mes culpabel y pa diabel no cohe bentaha den bo bida e palabra di Dios ta bisa lo siguiente;
Si nos confesa nos pica E ta fiel y husto di pordona nos, nos picanan y libra nos di tur inhusticia.
Tene cuenta cu Dios ta pordona nos pica ora nos bini su dilanti cu un curason arepenti, y nos reconoce nos fout, pasobra no por tin pordon si un hende no reconoce su eror, hasta den corte di mundo, si un hende reconoce cu e a haci robes y ta pidi despensa di curason, y no despensa pa cara di juez y famia, pero despensa di berdad pa locual cu e a haci, Dios mes lo haci sobra pe.
Si un hende para banda di bo ora bo ta malo, ta algo di aprecia tur momento, pero no lubida cu ta Dios a sanabo, y a lanta bo for di bo cama di malesa. Pesey no lubida di gradici Dios, y no bandona caminda di Dios despues cu E a haci cosnan grandi pa bo.
Semper mester tin un lugar den bo curason pa gradici Dios, pasobra salbacion ta bini solamente di nos Senjor Hesus Cristo, no tin salbacion den ningun otro ( Hechonan 4:32).
Bendicion , liberacion, sanacion,restauracion,ta bini solamente di Dios.
Hende mester reconoce e grandesa di Dios den nan bida, den un palabra bisa cada ken sa kico Dios a haci den nan bida. Cada ken tin un motibo di para keto un rato y bisa:
O Tata mi ta gradici Bo pa tur locual bo a haci pami, pasobra si no tabata pa Bo Dios, awe mi no tey.
Sinceramente, Pastor Marcel Balootje
