Asina Señor nos Dios ta bisa: Pasobra Ami sa e plannan cu Mi tin pa boso, Señor ta declara,plannan pa pas y no pa calimidad,pa duna boso un futuro y un speransa. Anto boso lo sclama na Mi y bin haci oracion na Mi y lo Mi scucha boso. Y boso lo busca Mi y haña Mi ora boso busca Mi cu henter boso curason . Y lo mi laga boso haña Mi , Señor ta declara.( Jeremias 29:11-14).
Obedencia na Dios ta obligatorio pa nos tur. Ora nos no obedece Dios nos bida no tin direcion, e ta manera un barco sin timon, e no tin compas, tampoco vision of proposito.
Den desobedencia, no tin futuro, nos bida ta stanca, pasobra nos ta perde comunicacion cu Dios, diabel ta drenta den nos bida, y tur locual cu nos ta haci ta cosnan den nos mes forsa, sin e sabiduria cu nos mester tin di Dios.
Den tur cos nos por tin mil y un experto, y consehero pero si ningun di experto nan ey no ta den obedencia na Dios, nan tur ta conseha for di nan propio pensamento, lagando asina Dios un banda, cual ta e peliger di mas grandi cu ta existi pa tur proyecto y pa bida di hende.
Obedencia na Dios ta haci conoci cu nos ta yuinan di Dios.
Obedencia na Dios ta demostra cu nos ta fiel na Dios y nos ta confia den Dios.
Obedencia na Dios ta amplia nos conocemento di Dios.
Obedencia na Dios ta Alabansa na Dios.
Obedencia na Dios ta haci nos amigo di Dios.
Obedencia na Dios ta trece abundancia di bendicion.
Ora nos obedece Dios su palabra nos lo tin bida largo.(Efesionan 6:1-4).
Obedencia ta mihor cu sacrificio.
Obedencia na Dios ta mustra cu nos tin respet y temor di Dios.
Mira mi ta bin pronto, y mi recompensa ta cu Mi, pa duna cada hende segun loke e a haci. Ami ta e Alfa y e Omega, e Prome y e Ultimo, e principio y e Fin.( revelacion 22:12).
Obedencia ta trece exito ( Josue:1-8) E buki di ley aki lo no aparta for di bo boca,ma bo mester medita den dje di dia y anochi, pa bo percura di haci conforme tur loke ta para scirbi den dje.Pasobra e ora ey lo bo haci bo caminda prospera, y e ora ey lo bo tin exito.
Esun cu tin Mi mandamentonan y ta warda nan, esey ta esun cu ta stima Mi, y esun cu ta stima Mi , lo wordo stima door di mi Tata, y Ami lo stime, y lo manifesta mi mes na dj’E.( Juan 14:21).
Cuanto hechonan di desobedencia na Dios no ta tumando lugar tur dia riba e mundo, y serca nos aki banda tambe influencianan di desobedencia ta manifesta, y hende ta haci desobedencia y falta di respet y temor di Dios un custumber y nan ta lubida cu desobedencia ta aleha hende for di Dios, y ta kibra nos relacion cu e Spirito Santo di Dios.
Ora nos desobedece reglanan di trafico, e lo tin consecuencia serio pa nos bida,ora nos ta bebe for di control, ora droga ta forma parti di nos bida, ora inmoralidad ta domina, y scuridad ta avansa tur dia mas y mas den nos bida, ora nos no kier pordona, ora orguyo y arogancia a bira e cuminda di tur dia pa nos:
Ta un señal di gran desobedencia na Dios, di cual nos tin di arepenti y bolbe bek na Dios.
