No tin nada mas bunita, ora den nos bida obediencia na Dios ta bini na prome lugar.
Dios ta priorisa obediencia tur momento, no ta importa e posicion of situacion cu un persona ta pasando aden ta e obedencia na Dios,ta tur cos den nos bida.
Ta e obediencia na Dios, cu Noe tabatin, cu e y henter su famia a scapa durante di diluvio, pasobra si nos tur por corda, Noe no tabatin ningun experiencia di traha e Arca, solamente e a obedece Dios, y Dios a sostene su obedencia, durante 120 anja trahando e arca, y tambe den e dianan di diluvio.
David no tabatin ningun experiencia militar, pero su obedencia y fe den Dios, a pone cu e a vence Goliath.
Un hende por ta hopi sabi, manera Salomon, pero nos por wak con desobedencia a pone cu cos no a bay bon cune.
Un hende por tin hopi forsa y experiencia manera Samson, pero nos su desobedencia a pone cu su final no tabata agradabel.
Obediencia su rais ta mara na Fe,ora un hende tin fe den Dios, e ta obedece y sigi Dios aunke e tin cu keda para su so, pasobra ta su obediencia ta su defensa y su obediencia ta hibe na e victoria.
Den Mateo 7 :24-25 ta para scirbi: Pesey , ken cu tende e palabranan aki di Mi y haci nan lo wordo compara cu un homber sabi cu a traha su cas riba baranka. Awacero a cay, diluvionan a bin, y bientonan a supla, y a supla duro contra e cas ey, toch e no a cay, pasobra e tabata funda riba e baranca.
Den Santiago 1:22-25 ta para scirbi: Ma sea cumplidornan di e Palabra y no solamente tendedonan cu ta ganja nan mes.
Aki nan nos por mira cu no ta solamente scucha of tende ta importante den nos bida, pero obedece y haci ta mas importante. Pasobra asina nos ta mustra cu nos tin amor y confiansa den Dios, y nos ta su disipelnan.
Si boso keda den Mi y Mi palabranan keda den boso,pidi tur loke boso kier y esaki lo wordo haci pa boso,den esaki Mi Tata lo wordo glorifica cu boso ta carga hopi fruta,asina ta demostra di ta Mi disipelnan.( Juan 15:7-8).
Nos ta biba den un tempo caminda desobediencia a bira manera un arte, na prome lugar desobediencia na e Palabra di Dios, Desobediencia na Mayornan, y lamentablemente tambe desobedencia na Ley y orden.
Wak cuanto problema tin den comunidad pa motibo di desobediencia,nos tur sa cu desobediencia a drenta mundo via di Adam cu Eva, y te awe nos lucha ta contra desobediencia, y esun cu ta ocasiona desobedencia.
Desobedencia ta pica, y pica ta conduci na tur clase di perdida, hopi hende por ta sabi den nan mes forsa, pero desobediente na Dios.
Haci husticia y huicio ta mas aceptabel pa Senjor cu sacrificio. ( Proverbionan 21:3).
Den Daniel capitulo 6 , nos ta mira cu ora un persona ta para den obediencia y humildad na Senjor , Senjor ta para banda di dje,Daniel a sigi haci oracion na Dios, no ta importa e menasa cu tabatin contra su bida.
Hesus a bisa su Tata, Tata bo boluntad sosode y no esun di Mi, y nos tur por mira kico a pasa ora e a cumpli cu e boluntad di e Tata, y na final riba crus E por a bisa e gran palabra Ta !Cumpli!
Nos obedencia na Dios, ta e yabi cu ta habri tur porta.
Pasobra Dios semper ta bendiciona hende obediente.
Sinceramente, Pastor Marcel Balootje.
