Ta hopi desobediencia tin actualmente, tanto personal como spiritual.
Hende ta bay completamente contra ley, no ta respeta nan mes, tampoco respeta otro hende.
Hende no ta respeta regla di trafico, tur momento tin accidente cu hende burachi, no ta importa cu ta homber of ta muher.
Hende cu ta corre motorcycle ta bebe y subi caya manera nada no a pasa.
Hobennan ta corre brommer anochi sin luz y ta hop riba caminda grandi.
E falta di respet pa hende a aumenta, di un forma teribel, palabra malo ta skeiro tur caminda, parce manera cu mas palabra malo un hende ta papia mas sabi e ta.
Hasta mayor no ta respeta yiu mas ni yiu tampoco ta respeta nan mayor, scuridad ta aumentando tur caminda.
Hende ta falta respet pa Dios, hende ta chercha Dios, hende ta haci bofon di Dios, y nan ta lubida cu tur locual bo sembra lo bo cosecha.Ta masha facil awendia pa tuma malo haci bon , y tuma bon haci malo.
Pero maldad y inmoralidad nunca por trunifa riba berdad, berdad semper lo gana pasobra berdad ta di Dios, y no ta pornada e palabra ta bisa cu den Cristo Hesus nos ta mas cu vencedor.
Laga nos corda bon locual ta para scirbi den Romanonan 6:13-14 bisando: Y no sigi presenta e miembronan di boso curpa na pica, como instrumento di inhusticia,ma presenta boso mes na Dios como esnan bibo for di e mortonan y boso miembronan como instrumento di husticia pa Dios.
Pasobra pica lo no tin dominio riba boso, pasobra boso no ta bao di ley ma bao di gracia.
Y no lubida cu e gracia cu nos ta den dje, ta pa motibo cu Cristo Hesus a muri pa nos pica y pa gracia nos ta salba, pero esey no ta duna nos libertad pa haci locual cu nos kier. Antes nos tabata catibo di pica,nos tabata den scuridad y no tabata conoce Cristo Hesus, pero awor cu nos ta biba pa Cristo nos ta criatura nobo, den Cristo y tur cos bieu a pasa y a wordo haci nobo, kiermen e bida bieu di pica a wordo bandona.
Pero Pablo ta bisa den 2 Timoteo 3:1-5 tocante tempo trabahoso, y con hende lo cambia, y esey nos tur ta mirando awendia dia, cu no tin obedencia, tampoco respet, y cu hende no tin temor di Dios.
Den Genesis 3 nos por mira consecuencia di desobediencia pa Adam y Eva.
Den Numbernan 14 nos por mira consecuencia di desobedencia pa e pueblo di Israel.
Den 1 Sanuel 15 nos por mira consecuencia di desobediencia pa Rey Saul.
Den Jonas 1;3 nos por mira consecuencia di desobediencia pa Jonas.
Den Galationan 5:19 nos por mira consecuencia di desobediencia pa esnan cu ta pratica obranan di carni.
Den Genesis 19 nos por mira kico a pasa cu e muher di Lot pa motibo di desobediencia.
Den 1 Corintionan 6: 9-10 nos por lesa e consecuencia di desobedencia.
Un biaha mas den Romanonan 1 :28-32 Dios ta musta cla e consecuencia pa esnan cu no kier reconoce Dios.
Y awor bo por puntra bo mes pakico tin cas caminda mayor ta apoya e yiu su desobediencia, manera nan no ta parti di e mundo y ley no ta conta pa nan, y nan no tin temor di Dios, nan actitud ta malo? Acaso hende por a lubida ken ta Dios?
Palabra di Dios ta bisa cu bondad semper lo triunfa , y cu respet semper lo prevalece.
No laga scuridad di e mundo aki domina, laga nos ta obediente na Dios.
Sinceramente , Pastor Marcel Balootje
