Maske cuanto nos studia, e rango di universidad mas halto cu tin na mundo, no por surpasa e obediencia cu nos mester duna na Dios.
Tin hopi hende ta purba di saca Dios for di nan programma, pero ta yega un caminda cu nan ta ripara cu sin Dios e cos no ta funciona, pasobra hende ta propone , ma ta Dios ta dispone. E ultimo palabra ta bini di Dios.
Obediencia ta gera spiritual declara contra e enemigo:
Obediencia na Dios ta trece lus den scuridad.
Obediencia na Dios ta habri portanan cu ta sera,
Obediencia na Dios ta yena nos curason cu Fe y Speransa.
Nos exito den nos bida ta depende di nos obediencia na Dios.
Obediencia na Dios ta cuminda pa nos crecemento Spiritual.
Obediencia na Dios ta Cuida nos salud y nos fisico.
Obediencia na Dios ta e pilar di Matrimonio y Famia.
Obediencia na Dios ta aumenta nos integridad.
Obedencia na Dios ta aleha nos for di tur sorto di inmoralidad.
Obediencia na Dios, ta hiba nos na intimidad cu Dios, pa nos siña conoce Dios mihor.
Falta di respet na Dios y complace cu mundo, ta haci nos agradabel den bista di hende, pero abominabel den bista di Dios.
Caminda emocion y buscamento di fama ta domina, obediencia na Dios, no ta presente, pasobra hende ta bira mas stimador di nan mes cu Dios.
Ami Señor, ta scrudiña curason, Mi ta samina mente, pa duna cada un segun su conducta, segun e fruta di su hechonan.
Pa falta di obediencia na Dios, hopi famia ta biba den pobresa spiritual, den desunion, den division, pasobra na ta purba di haci locual cu nan kier, mientras cu nan sa hopi bon e boluntad di Dios pa nan bida.
Un persona desobediente semper lo bisa cu e no por logra, cu e no por cambia, pasobra e no kier somete su mes na Dios, pa asina e haña forsa pa resisti e diabel.
E palabra di Dios ta bisa den Salmo 37:9: Pasobra hacidornan di maldad lo wordo kita afo, ma esnan cu spera riba Señor lo hereda e tera.
Spera riba Señor sea fuerte, y E lo fortalese bo curason si spera riba Señor. ( Salmo 27:14).
Sin Fe ta imposibel agrada Dios, y duda ta e ladron di nos fe, mas nos obediencia aumenta, mas grandi nos Fe ta pasobra Fe y obedencia ta cana hunto, pasobra caminda tin Fe y obedencia den Señor eynan Señor su gracia y autoridad ta aumenta.
Un bida di obediencia na Dios, ta un bida di testimonio na Dios, den cual hende lo mira, cu berdaderamente Dios ta cu nos, pasobra ora un hende ta obediente na Dios, e no tin mester di bisa nada, pero na su frutanan bo ta reconoce su obediencia na Dios.
E desobediencia den palabra y hecho cu ta reina riba mundo awendia ,tin hopi hende bao di engaño, pa asina nan no por sinti e balor di obedencia na Dios, caminda Dios ta mustra hende cuanto E ta stimanan y con grandi Su Amor ta pa nan.
Pero Dios den su inmenso amor a stima e mundo, y a manda su unico Yiu pa muri na crus pa nos, pa tur esnan cu kere den dj’E tin bida eterna, demostrando obediencia na Dios.
Kere den Dios ta nifica obedece Dios, ta nifica biba pa Dios, ta nifica cu Dios tin e prome lugar den nos bida, y cu nada, tampoco ningun hende por separa nos for di e gran amor di Dios,den Cristo Hesus nos Señor.
Sinceramente, Pastor Marcel Balootje.
