Den un carta cu Obispo a manda pa bestuur di SMOA, pa Sr. Croes y Sra. Kock, e obispo ta mustra su rechaso cu ya na dos ocacion a pidi e bestuur pa entrega nan retiro, pero e bestuur no ta duna oido. Mientras e bestuur no entrega nan retiro, lo keda causa intrankilidad na Colegio Arubano. SOLO DI PUEBLO a ricibi un copia di e carta. E carta ta bisa:
Na Sr. Robert Croes presidente y Sra. Monica Kock vice presidente;
No ta haci falta mas pa bisa cu e crisis cu tin y e status quo cu a perdura pa varios luna na Colegio Arubano, no ta sirbi e trankilidad cerca e mayornan, e empleadonan y e studiantenan asina tambe no ta beneficia e calidad di educacion.
Hunto cu e mayornan y e maestronan di e mas di 1600 studiantenan na nos scol catolico, mi ta puntra; cual ta bo berdadero interes? Esun di e hunta of esun di educacion cu bo a wordo confia cune?
Bo persona a escoge pa pone na dos ocacion mi peticion un banda, ignora mi peticion, den mi calidad como obispo, e autoridad competente, di tur scolnan catolico cu ta cay bao mi autoridad na Diocesis di Willemstad, por lo tanto, tambe Colegio Arubano.
Ta muestra di poco respet, pa e convencio firma na April 2008,voluntariamente entre e conseho escolar (inclui SMOA) y obispo di Willemstad su autoridad eclesiástica competente ratifica den dicho acuerdo riba scolnan catolico y educacion catolico, unda su hunta ta obliga di cumpli cu e obligacionnan estableci den Sección IV.7 di e acuerdo ” Administracion di hunta escolar mester tene nan mes na e leynan canocica y otro liñanan di maneho pa administra scol catolico” , cu mester wordo sigui.
Awor mi ta dirigi mi mes un ves mas na boso tur cu ta forma parti di e hunta di Stichting Voortgezet Onderwijs Aruba (SVOA) y h.o.d.n. SMOA, pa scucha e voz di mayornan di nos alumnonan, e voz di preucupacion di maestronan di Colegio Arubano ”vox populi, vox dei’, e voz di e comunidad di Aruba unda cu pa di tercer ves ta pidi pa boso renuncia boso cargo como miembro di hunta ehecutvo di SVOA/SMOA.
Ta considera boso permanencia como miembro di hunta como uno no apropia pa e reputacion y e ta dudoso. Un curso positivo ta necesario pa SMOA den interes di su alumnonan, e mayornan, maestronan y personal no docente.
Si e peticion aki cu ta yega serca boso via koerier y per e-mail, dentro di 72 hora, boso no no duna oido, mi ta hayami obliga pa pidi autoridad eclesiástica competente pa solicita autoridad competente pa tuma e medidanan apropia pa garantisa e calidad di enseñansa na Colegio Arubano. Por lo tanto, bo mester entrega tur documento, registro y filesnan cu ta enccontra bao di bo persona, den forma digital como tambe copianan imrpimi riba papel, pa transferi esaki na mi Vicario Episcopal na Aruba, reverendo pastor Andrés Makowiec, den presencia di e miembronan di e Comision Episcopal, t.w. e venerado diácono Michael Nicolaas y atraves di streaming di diácono Richard Colastica.
Mientras tanto, me ta termina dunando bo danki pa bo servicionan presta na Aruba y na nos Diócesis. Cu e bendicion mas di Dios y mi aprecio bo trabao di pasado. Asina e carta a termina, cu firma di Obispo Sr. Luis Secco.
