Corupcion politico cu corupcion di un ambtenaar ( DIP) ta dos cos totalmente diferente!!!
Diaranson awor, presidente di Parlamento Sr. Ady Thijsen a yama e reunion cu topico “Marisol”. E reunion a cuminsa dia 31 di juli 2020, pero no a termina. Na inicio di Segundo Rond, a pidi un schorsing y cual ta haci cu diaranson awor, casi un luna despues e reunion lo sigui.
Corupcion:
Marisol a indica cu e topico di reunion no ta desconfiansa manera cu dos parlamentario di POR a indica, pero ta trata di corupcion cu el’a bin encontra den su ministerio. Maske cu Marisol no ta menciona cu palabranan mucho cla, e ta duna masha hopi referencia na loke e ta yama casonan di corupcion. Ora cu nos a analisa e primera tanda di Marisol, berdad el’a papia di hopi asuntonan iregular cometi pa empleadonan publico na DIP, pero nos no por a relata, dicon e ta pinta esaki como corupcion politico! Corupcion politico, cu corupcion di un amtenaar, ta dos cos totalmente diferente!
Tin henter un seccion/departamento den DIP cu ta corupto:
Biniendo bek riba Marisol su discurso di 31 di juli 2020, nos por conclui cu segun Marisol, cu ta casi henter DIP ta corupto. Marisol a menciona na varios ocacion di problemanan den DIP, manera proceduranan, pagamento di placa bao mesa, y otro manipulacionnan cu a tuma lugar, pa cual full un departamento den DIP a wordo manda cas.
Dia 31 di juli, Marisol a bisa den Parlamento: “Riba e parti di DIP, na e momentonan aki, manera ma bisa, tin afdeling, no solamente plat gelegd pavia disciplinaire maatregelen. Berdad tin hende manda cas. Y nan por grita cu “no ta persecusion”, no no. Bo no por persigui. Het gaat om feiten, het gaat om bewijzen, wie dan ook is. Y ami ta verwacht di mi diensthoofdennan cu nan ta haci esey, sino ami ta rabia y nan tambe nan mag rabia cumi si ami no actua.”
Tambe Marisol a sigui bisa: A pidi un investigacion, un bes mas, cu ta bay den temponan atras. Dus ta bay wak por ehempel, instrui gobierno pa haci investigacion forensico den DIP, wak e iregularidadnan cu lo por tin di tereno, investiga casnan na Sero Colorado, situacion cu a bin topa awor aki tambe y tambe wak kico e ex minister a haci cu maatschappelijk investering, djis pa duna algun ehempel y wak tur loke a sosode pa wordo investiga.
Corupcion di empleado publico vs corupcion di politico
Segun nos a compronde, cu den su documentonan cu el’a pone ter inzage den parlamento, el’a pone varios asuntonan regardando empleadonan publico (ambtenaar), sea directo of via contract cu ta traha na DIP y ta acusa nan, of a sali na cla cu nan a haci actonan robes. Sinembargo den mes rosea, Marisol a bisa tambe cu nan a haya “disciplinaire straf”. Dus a gara nan ta haci algo robes, pero no tabata di un indole asina grave, cu nan mester a wordo kita for di trabao of denuncia pa acto di fraude na ministerio publico, pero solamente a haya un straf interno dentro di e departamento y kisas ya caba nan ta bek na trabao.
Exageracion? Di kier culpa Gobernante o Politico ?
Relaciona cu e asunto di corupcion/fraude di empleadonan di DIP, Marisol kier pinte como un corupcion/fraude politico, of alomenos asina e ta wordo capta den pueblo. Nos ta puntra nos mes: Ki valor agrega tin? pa discuti fraudenan di empleadonan publico den parlamento? Esey ta cos cu semper a sosode bao di gobierno di tur color y e minister di turno mester atende cune ne forma debido. Pues? Kico realmente te meta di Marisol? Mas peor ta cu ora hopi a pensa cu a kita e hendenan aki di trabao, a bin tende cu nan a haya disciplinaire straf.
Marisol a crea e percepcion cu henter Gobierno ta corupto, cu tur politico o minister tabata sa, cu el’a pone Evelyn na altura di tur cos, cu tur parlamentario tabata sa cu tin corupcion, pero a keda keto. Nos ta puntra nos si e hayasgonan aki den DIP, di empleadonan cu a haci algo robes dentro di un departamento, si no ta un exagracion diparti Marisol, pa bende esaki, trece dilanti of pa propagande como un corucpion politico cu ta envolve gobernante o politico? Esta kier expone corupcion di empleado (ambtenaar) y bende pueblo como un corupcion politico?
Si Marisol ta pensa cu e personanan cu e ta referi na nan den DIP, ta hendenan poni eynan cu e meta pa haci fraude, of nan a haci, of ta haciendo algo ariba ordo di un otro politico, anto e mester splica su punto hopi mas mihor na pueblo, y ta pesey e ta gosa di imunidad den parlamento, pe por papia habri. Cu el’a detecta 4 pa 5 hende ta haci fraude den DIP, y cu el’a atende cu nan pa corigi e situacion, nos no ta mira e valor agrega pa e exageracion y percepcion cu ta trata di corupcion politico.
